Get Adobe Flash player
Recent Post
Archives

KARBI ANGLONG

16 Lok Sabha kilik ingsamjin pen kichun

7,01,268 a voter angbong pen phant 76.7 vote kejok

Untitled Diphu:
2nd Phase Assam Lok Sabha kilik along pini 3 Autonomous District ST Parliamentary Constituency along vote jok etlo. Karbi Anglong arlo 16 Lok Sabha kilik kapachethang ahut klempar asong atum kapasiksak ajoine vote kejok aphai jumhekji asonsi thek long. Laso ajoine Observer, presiding officer lapen polling officer atum methang-methang polling station along kachedam kaphere do lo. La-an chot kali, Howraghat Tini ali along requisition gari aphan klempar atum tengkheng. Chinthong ahavar Amtereng along JCB aphan katekheng, Silbheta lapen kaprek-kaprek adim along klempar atum katengkheng dun kedokok ajoine Jangmi 10 arni kebarji requisition a gari driver atum ingpupe pulote gari vekdunde pusi khamkhe rinti. Bonta aphi District Administration atum pen chingki-chingvai aphi dorplup raikom dunsi Observer, presiding officer lapen polling officer atum aphan thon dun lo.
Soluk-sodak kedokok ajoine vote kejok aphai jumhek tahai pusi honthe rinti lo seta ratchari asong atum kilik kapachethang kisikpik ajoine rat atum aning chekhang un-ehsi ongdung aphai pen vote kejok aphan methang-methang ahem pen bar. Kedamtang Lok Sabha kilik ahut hini alongri arlo phant 69 ansi vote kejok aphai long, bonta non aphong Lok Sabha kilik ahut phant 76.7 an voter atum vote jok.
16 Lok Sabha kilik ahut Electronic Voting Machine (EVM) ajoine rat atum apor ateng vote jok longlesi chonghong nangkok lo. Vote kejok along kelang dunji arpu kedo asaiphu atum EVM ke-ot thek pameme det ajoine Diphu LA angkang Polling Station no. 137 Lower Dillaji LP School along 7:50 apor, 186 Polling Station Semson Sing Ingti LP school along 7:15 lapen Upper Dikrong LP School along L/W a EVM kaheno ajoine vote kejok 7:30 apor pensi pangcheng. La-an chot kali, Manja angkang  No.1 Mithiphang along vote jok bom ahut minut 45 anbak EVM henodak. Lason thakthak Sitlabari LP School Polling Station along bang kethom atum vote jokdet aphi EVM kaheno dak ajoine bang kethom atum batai hini vote kejok nang. Lason thakthak EVM kehona alam Baithalangso LA angkang Hamren Polling Station No. 88 Ambinong LP School along EVM kaheno dak ajoine ghonta 1:30 anbak vote jok longle det lo, aphi akaprek a EVM vanthu det aphi ansi rat atum vote jok longpin lo. Baithalangso LA ankang kaprek-kaprek a polling station alongta EVM kaheno ajoine rat atum kachonghong nang abirta long.
Bokajan LA kaparlo Sarupathar Constituency angkang long 9 Polling Station lapen Deopani constituency angkang polling station 26 along ingsamjin pensi 16 Lok Sabha vote kejok pachun. Bokajan LA angkang EVM keheno ajoine rat atum asapso kachonghong nang abirta long seta thetan kasiksak abirta long le. Lason thakthak Howraghat LA kaparlo 156 polling station along thetan kasiksak lapen soluk-sodak abirta longle.
3 Autonomous District (ST) parliamentary constituency along kilik aprang soluk-sodak do seta vote kejok arni hini alongri angkang pen soluk-sodak abirta longle. 16 Lok Sabha kilik ingsamjin pensi chun lo.

Latest news