ADVERTISEMENT

This area is available for advertisement. Please contact for details.

Arnivang
Get Adobe Flash player

Council anparta Karbi Anglong arat atum ingsamri bom pulote DGC chinghap po: KSA

Staff Reporter,
Diphu, Thekar, Vosik 21:
Karbi Anglong District hini pen isivet nong kachethang klong Diphu Government College pining anke morimsang asonsi dokok lo pusi pini amethang asaihem along pherangke amai kangni ahut KSA atum ningkangsamse chepaklang.
Kedamtang 2012 aningkan Diphu Government College along Dr. N.K Sharma principal anghoi nang kangni arni pen ke Diphu Government College along kemesen kacharli atemon amatsi ave det lo. Laso ajoine aningkan vangsi DGC along loh kacharli aosomar atum aphai tame nangjum bom lo. Laso ateng pini 2019-20 abaha HS 1styear along men kachethap dunji aphan kachoningri aloh kachojok dun aphai ta ing-arpik asonsi thek long.
DGC HS 1st Year along stream kethom Arts, Science lapen Commerce do, lathom stream pangrumpet pen kado kave inghoi 1000 kapangni ajakong Diphu Govt. College along do, seta stream kethom pangrumpetsi kado kave bang 306 atum ansi amen chethap dun chot lo.
Arts stream along kado kave Section pli A, B, C, D ando a section tin along bang 150 anghoi do, laso ateng pulote Arts along loksi inghoi 600 an do. Laso angbong pini aningkan ke Section A pen B apharmansi amen thap chot lo. Section A along bang 117 lapen Section B along bang 121 ansi amen chethap lo. 
Commerce stream along kado kave bang 120 charli osomar atum aphan anghoi do seta pining aningkan ke amen kachethap dunji aphan bang 28 atumsi kachongri aloh jok dun chot. Laso angbong pen bang 22 atum amen chethap dun lo. Science stream along tame bang section A,B pangrum pen bang 240 charli osomar aphan anghoi do seta bang 52 kachoningri aloh kejok angbong pen bang 45 atum ansi amen chethap dun lo pusi pherangke amai along KSA ameiphu Simeon Rongphar jai.
Karbi Anglong Autonomous Council a CEM Tuliram Ronghang lapen Higher Education a EM Jagatsing Ingti kelang dun kapangkreve ke ningduk meme. Alangli Principal Dr. N.K Sharma aphan kaphere rong ajoinesi pini Diphu Government College sampridang lo. Lapuson jongsi dam bom pulote Diphu Government College kachinghapchekjisi angring dam bom lo. Lasi Karbi Anglong Autonomous Council, College along ajakong kedo atum anparta charli osomar api apo anparta hamphang asong atum pen pen mai kangniji aphan Council atum mai pha nangji puta Karbi Students Association atum hang puta meiphu Simeon Rongphar jai. Pherangke amai along KSA sankur chunbang Thomson Rongpi pen chenglok kaprek kaprek KSA klembangphu atumta chetong dun.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives