ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi aphuthak son trok alam jong dunsi KSA atum pinpur aloh kapajir

Karbi Anglong arlo Km 6-7 anbak nanglutsi Psiar along Meghalaya Police atum nang kaboha pen pachedam thu

Staff Reporter,
Diphu, Thekar, Vosik 21:
Lamki kijutje pin Assam Karbi Anglong lapen Meghalaya ahoi aphuthak pini Karbi Students Association atum Assam chief minister lapen Karbi Anglong Autonomous Council a CEM atum aphan aphan kapanong apinpur aloh West Karbi Anglong a Deputy Commissioner arideng pajir dam.
Pinpur aloh along Karbi Students Association atum pen kado kave sontrok kehang alamthe jong dun. Saikam pen kapangdak Notification TAD/R/31/50/150 dated 13/4/1951 ateng ahoi kedovetji aphan Assam survey lapen Survey of India atum pen puthot anghoi pa survey thu pame nangji. Khatkhasla along Assam police atum pen kikim a BOP Meghalaya ratpangri atum pen kekhang dun thip ajoine kachipri nangkok alar Karbi Anglong alongle kijut dam Umtang alangroi arei ansi kithirthip BOP kim dam nangji. Meghalaya ratpangri atum pen Am-i along nang kikim a BOP prisi, laso a BOP Saitsema aparsi pachikim dam nangji. Meghalaya ahoi kedai Karbi Anglong arlo ongdung kachingthur asai deng nangji, laso aphan dorplup atangka nangpi nangji. Havar along monsam kapadoji aphan sai deng nangji pu heihui alam pinpur aloh along Karbi Students Association atum kejong dun paso.
KSA ameiphu Suren Hanse, sankur chunbang Jemson Timung atum kejalin pinpur aloh kapajir dam along kaprek kaprek KSA ajabang atum cheto dunsi Assam CM pen Council a CEM aphan kapanong apinpur aloh West Karbi Anglong District arideng pajir dam lo.
Pinpurme, Assam lapen Council atum pen kangsamri ajoine atumi Vosik 20 arni Meghalaya asor atum asoi keme longsi atumi Meghalaya police atum Karbi Anglong arlo Km 7-8 anbak nanglutsi havar nang humrisi Psiar along sangkok lo. Laso nang kahumri ahut Meghalaya police atum pen lahai Km 7-8 ke Karbi Anglong alongle kali lahai ke Meghalaya alongle pusi kaningje tekang pusi havar kedo kachini dunvek atum pen birta long.
Bangso aphi hin-hin a police atum angbong chingki chingvaisi pini Vosik 21 arni Meghalaya police atum aphan pachedam toi lo. Laso ateng Meghalaya police atumta kachekroi ateng puthot chedam thu lo.
Assam police atum pen kikim BOP pachipridak lapen Assam Karbi Anglong arlo nanglut pen lapuson alam ningje tekang pen longle nang kacheraiji aphan kabor-i klangdak aphita Assam ratpangri lapen Karbi Anglong Autonomous Council atum penta laso aphuthak lamthe isita ave det lang asonsi thek long.
La-an chot kali kali Karbi Anglong arlo ongdung ahamphang asong do seta ahoi alam aphuthak kaningje dun atum ave, isi hini ahamphang asong atum ansi lamki kedobom West Karbi Anglong Asssam lapen Jaintia Hills Meghalaya ahoi alam aphuthak ningje dun chot asonsi thek long.
Kedamtang BOP kipri aphan kevangpak ahut Meghalaya asor kaningje lahai kado kave alongle ke Assam ratpangri atum aphan nang chojor et lo pu alamsi ahok keman detji asonsi non angring thek long bom lo.
Assam police atum Assam a district Karbi Anglong arlo kikim BOP Meghalaya kekroikre ajoine pridak. Assam alongle BOP kikim kopi apotsi Meghalaya asor kekroi alam Assam aratpangri atum kroi nangkok kado kave kamatha nangji alam binong.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives