ADVERTISEMENT

This area is available for advertisement. Please contact for details.

Arnivang
Get Adobe Flash player

Kungripi LP School asarnung ingkovang lo, ajakong kedo atum chinine det ma?

A Correspondent,
Dongkamukam, Thekar, Vosik 20:
Chinthong Constituency arlo ke-ongdung LP school a hem ke ningjoino lo. Osomar atum ratpangti LP school aphan ning kachethe kavepin ajok methong jongjung pen kangpu a school alongsi osomar atum loh kacharliji aphan kidun chihung rong lo.
Laso angbong pen kapacharli dun un edet atum ke bang ahem chobi dunsi loh pacharli atum ta do lo. School ahem kememe, tovar kememe, kijun alang kave, meh kave, seh kachelangji avarsai kave lapen ke ke-ongdung akisung rat atum chechak lo.
Chinthong Block kaparlo Kungripi along kedo a LP school ta non kivir detji anatsi dam bom lo. Laso a LP school along loh kacharli atum kenangsot a hormu heihui avepin khangjang lo. Anerlo a an kitunji ahem kave pen chenglok loh kethanji ahem kadure, kangni adim kave lapen kijun alang anta avedet lo. La-an chot kalilang ihumvet karjap lun a LP school ta asarnung kave ningkan kilit thupo. Akardong kavedet ajoine barla ahut ke osomar atum ke loh charli jokplot ateng lo.
LP school ahem pen pacheraplok ME school ahem ta do, bonta ahem keban thektik ajoine asarnung ke prithang lo, bonta non amat ke thanbang atum chepaduksi tin aban pen dip pasu-pasa pensi pining a barla angbong bang kep – ingkoi vet a osomar atum aphan loh than lo. Bonta isi manghumeme ke Kungripi along kedoprong ratchari along kachelang dun bom atum kosonsi laso a school ahem kahenorem aphuthak MAC aphan pachini damdet aphi anta pini kamatha nangji alam lo. Rat atum pen pachini det aphita MAC abang ari chehinhet loma mate MAC amatta Kungripi ahavar ningkan isi pen ephong bak ta kacheklangdamdedet apotsi school ahem kadure aphuthak chini dun dedet loma pusi ongdung kacheroktok arat atum charju.
Pinpurme, Kungripi ahavar rongsopi pen kaheloving adim lapen ke-ongdung kaboche arat ke kadure lapen chongdat chotelo atumsi ke-ong. Laso a havar kapachingthurji aphan pulote KAAC pen school kapachingthurji aphan sai klemsi kithurmi a ove atum aphan kangthaivang atovar kethopi akenangsot lo. Jongsi loh kacharli ahin paprang dun thekthe pulote laso ahavar kevangji arnita chingthur dun thekthe lo.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives