ADVERTISEMENT

This area is available for advertisement. Please contact for details.

Arnivang
Get Adobe Flash player

Khatkhasla along BOP kipri nangkok alar thirthip pen Umtang alangroi araisi kim nangji: ASDC

Staff Reporter,
Diphu, Thekar, Vosik 20:
Khatkhasla along Assam police kikim a BOP Meghalaya ratpangri kekhang dun thip ajoine kachipri nangkok alar Karbi Anglong alongle kijut dam Umtang alangroi arai ansi kithirthip BOP kim dam nangji. Meghalaya ratpangri atum Am-I along nang kikim a BOP prisi laso a BOP Saitsema athaksi pachikim dam nangji. Meghalaya ahoi kedai Karbi Anglong arlo ongdung kachingthur asai deng nangji, laso aphan dorplup atangka nangpi nangji.
Havar along monsam kapadoji aphan sai deng nangji, lapuson kedojoi ke chokche pu heihui alam jong dunsi Autonomous State Demand Committee atum Assam a chief minister lapen KAAC a Chief Executive Member atum arideng pinpur aloh pajir dam.
La-an chot kali ahoi along kedo ajahak atum voter lish hini along amen kedo aphuthak ta patarlip pame nangji puta kehang alam jong dun.
Assam ratpangri a chief Secretary S.D Pandit pen department Notification No.TAD/R/31/50/149 lapen No. TAD/R/31/50/150 dated 13 April 1951 kapangdak ateng Southern anatthu Karbi Anglong pen Meghalaya ahoi ke Umkhen alangroi pen Um Shunam hen lo lapen lapulote South East Jinkahula (3178). Lason thakthaksi kaprek-kaprek ahin kapangdak tang lapen aprang pen kejong tang ahoi ta pinpur aloh along Autonomous State Demand Committee pen klardak jong dun lo.
Non BOP kikim dam ke ahokpet ahoi along kali. Laso a BOP kikim ke Umkhermi pen Khatkhasla adaksi kim lo lapen laso adim ke ahokpet Karbi Anglong a district arlo binong anparta laso ahavar along Karbi pen Jaintia akhei atumsi kedo-kethak puta jong dun.
Lapu Khanduli ahin anatthu Meghalaya asor Km 10 anbak arlo nanglutsi Am-ih along BOP nang kim lo. Laso ahin ta ahokpet ahoi ke Saitsema hen lo puta jong dun.
Kapangdak ateng Karbi Anglong lapen Meghalaya ahoi ke Umtang mate Myntang alangroi hen lo. Lasi ASDC atum hala athak kejong atengsi prapjin pen papleng nangji puta Autonomous State Demand Committee atum pen pinpur aloh along jong dun.
ASDC pachethang chunbang Daniel Teron pen dihin chunbang Sanjoy Killing atum jalinsi pinpur aloh pajir dam lo.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives