ADVERTISEMENT

This area is available for advertisement. Please contact for details.

Arnivang
Get Adobe Flash player

CIDF atangka pen Diphu angkang ason-ason kachingthur asai deng po: CEM

Staff Reporter,
Diphu, Thekar, Vosik 19:
Pini Vosik 19 arnikangsam Diphu KASA conference hall along Karbi Anglong Autonomous Council a chief executive member Tuliram Ronghang pherangke amai pangni. Pherangke amai along City Infrastructure Development Fund amen pen central pen state ratpangri atum atangka Sika 100 crore nangle po lapen laso atangka pen kopi-kopi asai keklemji aphuthak alangli pangdak lo.
Laso ateng pini nelitum hithi angkang kopi-pisi keklem nangji akenangsot kedo langchari dam lo. Laso ateng Diphu-Manja atovar mile 5 Recreation Park adunghet alongsi Bus kapasang (station) adim (ISBT) selampo. Laso adim kado kave chiri 50 alongle do. Laso alongle along bus kapasang adim pen chenglok truck lapen kaprek-kaprek a gari ta ladaksi pasangpo puta pherangke amai along CEM Tuliram Ronghang pangdak.
Veterinary athengno Diphu Rongkhelan ahithi lang a ok pen chenglok kaprek-kaprek a ok kejor anparta han parvo kejor atum kedo ajoine tovar kedam-kevang akasiksak dolo. Laso ajoine ahut pen ke tovar along  kepho ta do lo. Laso ateng pini nelitum Veterinary kelangchari a EM pen Principal Secretary i/c Si-im Taro anparta kaprek-kaprek atum pen langdam lo. Laso ateng Rongkhelan ahithi Veterinary complex atum alongle asapso en dun pen kangpu dang (Open) market shed selamsi hithi kapangni damji aphan cherai lo.
KASA stadium aphan multi sports complex selam lo, seta laso along indoor stadium dolo, seta kave ason dopik lang. Laso ateng aban indoor stadium anatthu basket ball court, swimming pool, table tennis anparta lawn Tennis heihui kapathu adim kaselamji aphanta netum langdam pen cherai lo. Aprang Niti Aayog atangka pen klem lo seta halaso along lahai apharman kave det ajoine non CIDF atangka pensi klempo.
La-an chot kali Diphu Town Committee kaparlo a ward committee tin along kedo atok-ano kacheleng atovar ta paver block atovar selam etpo pusi cherai lo pusi pherangke amai along KAAC CEM Tuliram Ronghang pangdak.
Kado kave a ward along lang adong amokha keheno et lapen kave lang adim ta kaselamji aphansi pini netum langdamsi kaselamji aphan cherai lo. Kachonghu lapen kaprek-kaprek kaheno dak asai kapajumji aphan ward tin alongta CCTV kibiji anparta solar street kaselamji aphan pen chenglok kado kave 21 a project netum deng lo.
Rat atum kenangji ateng ward tin along ta waiting shed kacheselamji aphan cherai lo.
ASEB atum kacherai alongle mate power house anatthu ta two lane atovar selam. Laso atavar ihin anat dongsi selampo lapen ihin anat ke monit atum akeng pen kedam atovar selam po. Power House anatthu han kachojor bom atum aphan kapatorare detji aphan market shed selam pisi ahithi terek phit lo puta CEM Tuliram Ronghang pangdak.
Ward tin along kenangji adim along traffic signal selampo lapen ward tin along kedo ratpangri a boundary wall along mesen-mesen arjan pahipo lapen mo aphita kepraipre detji aphansi sai klempo puta pherangke amai along pangdak.
Lahai kado kave asai amokha kejong aloh (Concept paper) hithi irui angbong central lapen state ratpangri atum arideng kapaleji aphanta pini nelitum cherai lo puta CEM Tuliram Ronghang jai.
Diphu ahithi angkang kopisi keklemji lapen kosonsi kapalang mesenji aphan Diphu Town Committee chairman pen chingvaisi isi Diphu Town Development Committee sengji. Laso along Si-im Taro aphansi chairman pek lo. Laso amei pensi kevangji arni kopisi keklemjima aphuthak chingvai po lapen lang ponpo puta CEM Tuliram Ronghang pherangke amai along pangdak.
Diphu ahithi kapangthir et verji aphan Diphu ahithi along polythene ke-en khangpo lapen hithi achitim Assam Riffles kedokok aphuthakta isi pen isi asai nelitum klem bom lo puta pherangke amai along CEM Tuliram Ronghang jai.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives