ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong arlo Khei ke ong pen kisung

Karbi akhei ke khei kangthim pusi ili kachepu seta Karbi akhei kado kave angtan penta nang kachingvui lapen khei nang ke ong pen nang kangvui dun ajok ili Karbi akhei khei kangthim along pabeng detji nangnak. Karbi Anglong a district lapu an a kethe India along district kethe angbong amen chelong dun lo. Kethe along monit ta nang ong, nang ong puseta khei ta nang ong. Kalakha angbong non an khei krethrok do lapen kheiso-kheisa pen pangrum pet te khei 26 anbak dokok tahai pusi Statistical Deptt. atum ningje. Ladak lapu an nang kebat long varet ke Karbi atum aning kasejoi apot lapen phodet tengnedet pen kachingri kave ajoine. Karbi atum kachepangrengmeji lapen kaselet ajoine angtan pen sai chotiki atum kevang pen ser alongle theklongsi ami angkur pachesak bin. Komatme choki chokam anat pen kevang, komame ke bepar, komatme ke govt. service…………. lapu an amat kachotoi abang ke thekthe det ajok sakok-sakok amat monit armu nangchan bin. Non kaphere meme angbong an pen ke Bangladeshi pen; latum ke armu chot kali kedo kethak ta nangpangthaksoji.
    Khei ang kebat ajok penang akhei atum ahavar-havar longle cherai pen longri amen nangche-ir pen chepahemphuji aphan sorkar along kehang pen danglok ason-ason nangklem pen nang pasiksak bom lo. Kaphere meme lapen kasiksak-i ke akhei tin ta non arlo asong nang chesengrep ajok Karbi atum angbong ratchari kepathe pen kachetokte pen non ko an ma kesung kepho apar nangpho jilang. Athe ke penang khei kethe angbong atum ke arlo asong pen nangcheharjak bom. Non Adivasi atum ta nangcheng tang lo, ha nang kachesengmiji atum ta nangdo lang. Lason amat arlo asong aso kevang lapen kachepatu adim cheplang.
    Non lahai kethetan amo pen kachesongji aphan ratchari atovar pensi chesong nangji athe Karbi atum aphan mute bang chingrum pet pen bang nang ongmu lapen ili kachingrire ajok pen nang phere. Karbi Anglong arlo kedo an ratchari asong angbong kepacheton do nangji lapen ratchari asong atum ahoi angdeng non kepathe ason pathethe det nangji. Non ateng pulote alar kachehui seroi ansi Karbi ke nang sungpikji.
    Non kethetan amo keklem nangji atum ke Karbi Anglong arlo kedo an Social Organisation chelangrappetra lahai aphuthak Bangladeshi, Drugs kecho pen danglok ke chesong nangji. Keklem ta komatme ratchari asong/arlo asong atum aphan kerap dunchotji abang klemkle det nangji. Kedo an chelang pen isi “Common plateform pen common issue lapen common interest” pensi chesong nangpo. Pini aphan kado kave ta mathathe ra penap koson pensi akemeji, hala abang le mathahur pen keklemsi akemeji. Pini ning kacheso an khei alam pen matha ra chediya seroi nang vekji.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives