ADVERTISEMENT

This area is available for advertisement. Please contact for details.

Arnivang
Get Adobe Flash player

DCH along akimi avarsai kipi thek apot CEM pen Medical EM atum aphan MLA Dr. Momin kachoro

ABVP Karbi Anglong atum akejoi pen vi kachipi

Staff Reporter,
imageDIPHU, Thekar, Vosik 14:
World Blood Donor Day arni pacheton dunsi Akhil Bharatya Vidhyarthi Parishad (ABVP) Karbi Anglong atum pen pini Diphu Civil Hospital along akejoi pen vi chipi dam.
ABVP Karbi Anglong akejoi vi kachipi asai along KAAC Medical EM Khonsing Rongpi, Bokajan MLA Dr. Numal Momin, Nilip MAC Pabitra Rongpi atum pen chenglok kaprek-kaprek man kedo atum chetong dun.
Laso ahut MLA Dr. Numal Momin vi kachipi akenangsot lapen inut amonit phong ko-ansi vi chipi unji lapen ebang along vi kedo akenangsot alam than pachini tekang. Neli methang amatta non an phong 26 sose vi chipi tanglo puta Dr. Numal Momin jai. Lasi ABVP Karbi Anglong atum lapuson akejoi vi kachipi asaimo keklem ke kemesen asai binong lo pu pen alangli kachoro pajir.
KAAC Health & Family Welfare a Executive Member Khonsing Rongpi penta ABVP Karbi Anglong atum lapuson asai kedeng aphuthak kachoro pajir. La-an chot kali Diphu Civil Hospital along vi kedorde alamta alangli pachini. Lasi lapuson akejoi pen vi kachipiji atum aning kehang do pulote vang pen vi kachipiji aphan aphan EM Rongpi sangho choningri.
ABVP atum akejoi pen vi kachipi atum aphan MLA Dr. Numal Momin pen EM Khonsing Rongpi atum arideng pensi certificate pajir lo.
Laso aphi MLA Dr. N. Momin, EM K.S Rongpi lapen MAC Pabitra Rongpi atum Diphu Civil Hospital along ajakong kedo atum pen asapso amaiso ingni tekang. Laso ahut MLA Dr. Numal Momin pen Karbi Anglong Autonomous Council pen EM Khonsing Rongpi atum aphan kachoro pajir tekang athe alangli kabor-i pen Diphu Civil Hospital aphan akimi avarsai heihui kithik pen rat aphan ale pilo.
La-an chot kali Diphu Civil Hospital ingthirjir lapen doctor atumta amethang asai apor ateng pensi cheklem lo pu heihui alam penta alongli choro pajir lo.
Arpu pen kache-oh lapen strike kedo a doctor atum monit hijan kachinghon pen puthot amethang asai kacheklem thuji aphan MLA Dr. Momin choningri.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives