ADVERTISEMENT

This area is available for advertisement. Please contact for details.

Arnivang
Get Adobe Flash player

Assam asor nang kejor tang alongle pusi Meghalaya asor kaningje tekang pusi mek renglor atum ningje

A Correspondent,
Diphu, Thekar, Vosik 14:
Meghalaya kedai Assam West Karbi Anglong ahoi Umkhirmi along kedamtang Vosik 11 arni rong arat atum jokjak cherapdunsi Umkhirmi Rongman along BOP kim lo. Laso kikim bom ni thom kepleng Vosik 13 arni Meghalaya Jaintia district MLA, Deputy Commissioner, Superintendent of Police, Magistrate lapen rong arat atum BOP kikim along vang paksi kikim bom BOP pachipri toi lo. Kedamtang arni Assam asorsi Meghalaya state aphan nangjor detlo pusi Umkhirmi arat lapen BOP Police saiphu atum aphan than tekang pusi Umkhirmi arong arat pen nang chethan dun. Lasi komat abangphusi lason Karbi Anglong alongle Meghalaya state aphan nang kejor ma laso abangphu aphan nep vek nangji puta rong arat ase chepathe rinti.
Angton alam kacheni longji aphan pura Amreng Constituency a MAC Rina Terangpi pen Socheng Constituency a MAC lapen KAAC EM Rupsing Teron lapen Jerikindeng OC Anthony Rongpi atum adim along humri dam. Jatsemet adim along KAAC atum kapale dunder pu ajok rong arat atum aning kipung chepaklang lo.
Assam ratpangri atumsi bangso BOP nang pakimtoi lo apot puthot Meghalaya lapen Assam West Karbi Anglong ahoi tokklok Cheri Tarchen alongle ilitum rong arat police administration thurpak lapen neli MAC jokjak prapjin pen BOP kim damthu det lo nang pusi Umkhirmi arong arat aphan MAC Rina Terangpi chechak tekang. Meghalaya lapen Assam West Karbi Anglong ahoi alam ke nonhet pen kalilo, neli bihek penta bangso alam arjudun long bom lo. Lasi non neli MAC dotik ke bangso ahoi alongle un-an ke chedan dunji pusi MAC Terangpi rat aphan aning pathe tekang.
Halapu, Meghalaya ahoi kedai West Karbi Anglong arlo nang kedo Khatkhasla arong arat a Khasi atum ningkan 30 bak dotanglo election abatai tinta Karbi Anglong a kilik along vote nangjok dun anparta Karbi Anglong pen kipi kachingthur ason ta alanglitum chodengde, lasi latum aphan prapjin pen Assam ratpangri lapen KAAC pen kapatharle asai klem serak nangji puta ahoi kedo arat atum choningri.
Methang alongri kacheraikomji aphan nanglitum ningkipung thek ke ahok ilitum elongri aphan kachinghon do binong pu angthek lo pusi Umkhirmi arat aphan EM Rupsing Teron choro tekang. Anparta Assam ratpangri pen ilitum aphan Border ahoi keraikomji aphan long thom BOP nangpilo, Umrukuti, Saitsema lapen Khatkhasla along. Lasi nangkipi tangdet a BOP ke puthot prapjin pen Assam ratpangri pen KAAC atum arsikjit chingvai damthusi prapjin BOP kim thu lonang puta EM Teron chechak tekang.
Jasemet, Meghalaya Jantia Hill district a MLA atum vangpak pen Meghalaya chief minister aphan lamthe chepale lo, laso atengke Assam chief minister Sarbananda Sonowal pen chingki-chingvaisi Assam chief minister Sarbanada Sonowal West Karbi Anglong deputy commissioner aphan phone pen BOP a camp che-en pondet non pu alamthe kelong ajoinesi nelitum saijokje BOP kikim bom Umkhirmi Rongman along pen vang nangkok lo pusi Jerikindeng Police Station OC Anthony Rongpi pherangke aphan than.
Lason Assam ratpangri pen BOP kepachepri thu nangkok ke Assam ratpangri atum Meghalaya ratpangri aphan kachojor chenam asonsi angring dokok lo. Lapuson pulote ilitum Karbi Anglong alonglesi kekonpo, lasi ajat asai pen tame bangso asai langno keklem along ke chedon dun thekthe pusi ajahak cheroktok arat atum ningje.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives