ADVERTISEMENT

This area is available for advertisement. Please contact for details.

Arnivang
Get Adobe Flash player

Panchayat aron ke ladak akenang ave: APHLC

Staff Reporter,
Diphu, Thekar, Vosik 12:
Assam State Election Commission pen kaselam Assam Panchayat Act 1994 a Section 114 lapen India a constitutution along kedo Article 243K anparta India a constitution along kedo Article 243 m ateng Sixth Schedule ajakong pen kachari alongri arlo Panchayat aron palut longle. Laso ateng pulote MoS 2011 along kedo Paragraph 2.5 ke aron karkan lo, lasi lar nangji kalite varphit nangpo.
Kedamtang 2012 lapen 2017 aningkan Council kilik Assam State Election Commission pen nang kapado long ke Assam Panchayat Act 1994 ateng pulote KAAC aphan pangdeisi zilla parishad ason pinchong det lo. Lasi aron ateng pen langdam pulote 2012 pen 2017 KAAC kilik ke aronre a kilik lo. Seta Council atum laso akechokche chepangkeng thekthe det lo. Laso akechokche kedamtang Congress kachari ahut nang do lo athe halaso ahut Congress atumsi kachari ajakong cherai lo. La-an chot kali sixth schedule aphan kapanahok kethepik a MoS ta halaso kachari ahutsi chetok lo pusi APHLC atum kedamtang Vosik 10 arni kapajir KAAC a CEM aphan kapanong apinpur aloh along jong dun.
Panchayat alam pen chenglok kaprek-kaprek alamthe ta APHLC atum pinpur aloh along jong dun. Pinpurme, alanglitum pen pinpur aloh along kejong dun, Guwahati High Court pen kedamtang 2019 Arkoi 13 arni kipi alamrai ateng sixth schedule a Paragraph 2, Sub paragraph 7 ateng Council kilik lapen voter list kaselam Act pen Rule selam serak nangji.
Laso aron kaselamji aphan drafting committee kapajalinji aphan Horen Sing Bey aphan chairman kepek ta chokche athe alangli ke MoS a signatories pinak, alangli jongsi do pulote MoS Para 2.5 pen ke kachetonte dokok po. Lasi PIL Case No. 9/2017 kipi atum aphan drafting committee along bangphu pon vek nangji pusi kehang alamta jong dun.
UPDS atum MoS alamdon chetoksi tangka Sika Crore 1000 van lo tahai seta sixth schedule ajakong ke ratpangri aphan hodai tekang kok lo. Tangka pen jakong kachelar asonsi man det lo.
Sixth schedule ajakong kapavirji aphansi high command atum nangliphan sai nang paklem bom lo. Bangasena atum non aphong lok sabha kilik along bangphu chetoi dun kilik pahai lo. Barak Valley along alanglitum Hindi alam kaningje atum aphan khamkhe lo, kevangji arni ladakta inglong aso akhei atum alam kaningje alongta nang khamkhe dun po.
Bang 52 Bangsena klembang atum ari chirungsi ratpangri arideng chehodai lapen alangli jongjung nangli pen chingki lo seta nangli hin pen alanglitum aphan thangnat klem pipe lang puta APHLC apinpur aloh along jong dun.
Sixth Schedule ahavar along ke inglong aso kali mate ST kali det atum aphan ajat aphuthak keraikom pi ave. Laso ateng MLA kalite MP aphan aphanta ST kalidet angtan aso atum aphan raikom pi un-eh lo.
Karbi Anglong Autonomous Council atum pen Karbi aphan Ser Van Kep, Kuki atum aphan Tulsong Vaisa, Dimasa atum aphan Salairyaro, Khasi-Pnar atum aphan Dorbar Shnong, Rengma atum aphan Nzang Terupvonyu Song Sadwen, Garo atum aphan Akhing Nokma, Ao Naga atum aphan Putumenden lapen Karbi Anglong kedo Man-Tai atum aphan Muk Pom Hum Chou Hu Ban kaselam piji aphan Sixth schedule pen KAAC aphan ajakong pilo. Lahai ke Panchayat pen isivet asonsi dopo puta jong dun.
6th Finance Commission pen Ser Van kep aphan tangka pi nangji. Kedamtang 2014 aningkan lok sabha kilik ahut kachechak ateng India Constitution along kedo Article 244(A) pachunsi autonomos state nang kipi ke kenangsot lo.
Sarthe Phangcho alongle lapen deputy commissioner office alongle aronre pen kacherai atum aphan plungsi ahemphu vek atum aphan pi nangji puta APHLC atum pinpur aloh along jong dun.
Assam reservation aron ta akenangsot kali, TET asatlang ta sixth schedule arlo ke Schedule Tribe atum aphan an chot nangji, Mikir Hills (Transfer of Land) Act. 1959 ta larsi akimi selam thu nangji, Dispur pen Council along kedo saikam 30 a chokamar atum aphan online bainong kipiji puke thangta kalilo, lake nang kipitang asaikam puthot nang kache-en thuji aphan chot lo puta jong.
LDRB along Karbi pen Dimasa atum apangthek kapavirji pu along chekroi dun thekthe athe lake BJP atum det isi, lam isi pu akemang akrong anatthusi kepon lo.
Voreng kave ariso-okorjang lapen osomar atum ban-sot keman bom aphut hak APHLC atum pinpur aloh along jong dun. Laso aphuthak alanglitum kejong dun ke, aningkan vang suri-suri a riso-okorjang atum aphan kethe dung a rongsopi alon voreng kelongji mate kachongdat damji aphan pu pen katsi bang akhei along ban sot man dam bom lo. Lason keman ke sixth schedule ajakong ateng pen Council atum kachingthur asai klem haihe det apot lo puta All Party Hills Leader’s Conference (APHLC) atum pen KAAC a CEM aphan kapanong apinpur aloh along jong dun.
APHLC ameiphu J.I Kathar IAS (Rtd), sankur chunbang Jana Terang, lamjai sarpo Angtong Ingti atum kejalin along ongdung song klembang atum cheto dunsi kedamtang Vosik 10 arni CEM aphan kapanong apinpur aloh Council secretary Si-im Taro arideng pajir dam lo.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives