ADVERTISEMENT

This area is available for advertisement. Please contact for details.

Arnivang
Get Adobe Flash player

Khatkhasla BOP kikim Meghalaya asor khang dun chek

Our Correspondent,
Diphu-Hamren, Thekar, Vosik 13:
West Karbi Anglong anghoi Meghalaya kedai Khatkhasla along Border Outpost kikim bom along pini Meghalaya atum vangpak amat khangdun chek pusi West Karbi Anglong a Adll. SP Alina Teronpi than.
Meghalaya pen West Karbi Anglong ahoi along lamki kedover mate Meghalaya asor aphong-aphong Assam Karbi Anglong alongle nang kacheraiji aphan kabor-i ver ajoine keton-kelang kapasikji aphan pusi home ministry pen ahoi along kethom Border Outpost kikim aphan hukum pilo. Laso ateng Umru-2, Saitsema lapen Khatkhasla along BOP pakim toi lo.
Umru-2 pen Saitsema along ke lamki do seta la-an set kali det ajoine contractor atum kim rang patangsi non amat BOP pangni long lo. Seta Khatkhasla along Meghalaya asor kapasiksak dunver ajoine contractor penta BOP kikim thekthe det lo.
Lason ahut BOP along kapadoji aphan raikom asaikhi a platoon atum aphan kedam nangji apor nang kele rok ajoine kedamtang Vosik 11 arni raikom asaikhi atum adim along ajo aporsi pale dam lo.
Khatkhasla along kikim tang BOP kave det ajoine raikom asaikhi atum amethang pen amatsi BOP ahem heihui kikim asai Vosik 12 arni adap pen pangcheng lo. Laso abirta Meghalaya asor longsi pini Vosik 13 arni adap porphai 10:30 apor malom West Karbi Anglong arlo Khatkhasla along Border Outpost along Meghalaya ratpangri Magistrate, SP, OC lapen ratchari asong anparta rat atum pen pen vangpaksi lamki pado dun lo. Laso alamki kedokok ajoine Khatkhasla along BOP kikim bom raikom asaikhi atum pen angsong angdeng along kedo ajakong kedo atum aphan kado kave alam pachini lo. Laso ateng asong ajakong (higher authority) atum jongsi lamki thedung pulote haladak pen nang cheterek ra Umkhermi an vangjui non pu kipu ateng non amat Khatkhasla BOP araikom asaikhi atum Umkhermi along vangsi nang do prong lo puta West Karbi Anglong a Adll. SP pen birta long.
Pinpurme, angkrak pen birta kelong dun ateng ke pini Khatkhasla along alamki aphuthak hini state a chief minister atum angbong chingki-chethan lo. Laso kachingki-chethan ateng pensi Assam CM Sarbananda Sonowal alamtoi atengsi Khatkhasla BOP along hem kachikim dam bom araikom asaikhi atum aphan Umkhermi an aphi nang kapacherui lo.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives