ADVERTISEMENT

This area is available for advertisement. Please contact for details.

Arnivang
Get Adobe Flash player

Song aphai kebat pen Karbi Anglong aphan akeme ma akaheno?

Karbi Anglong ta state kehang pu alam det le kachethang chot kali. Kachethang angbong pen ratchari kapathe, government alongle kacherai-kithi, kerai a ingnam kaparu, tangka kapanglim asai keklem, tangka kehangthap, scheme amokha patangte pen atangka kachethak pen kechodet lapen song amahang kapathek heihui ta kachethang-o. Laso ajok tangka nang kangsip aphan lok kevang atum dopik. Lahai along neli kipudamji ke ratchari asongja lapen ruling party atum det le adai kedo kali. Ladak ke ke-ongdung song asongja lapen lasonsi ke-ongdung arat ta kacherapdun do. Laso alam along neli kejongdamji ke ili kado kave ta ruling asongja atum aphansi kachopanglim akoi pi varet titi. Ahok lo keklem patirpi ke latum hen lo, seta laso along ke kado kave ta cherap plang pusi neli ke pudam liji. Kechengsi lapen kethenai ke rat atum kaike ta mek renglor pen le thekdun long seta langdun ding po chesongse det titi. Kenangsotnai kachesong nangji adim ke chesongse, hala keraidun nangji adim lapen atum aphansi chesong rong titi. Non pulonang, electric current kachethor ahok kave, hormu ador keso, scheme amokha keklem kapatangte, lang kadure, subsidy pen kelong asang, kerasin (kerosene) lapen jangthu kadure, ason-ason kelong nangji ason kelongle, contractor atum sai klem chit adim seta keklem kapasa-oi heihui ke dopik seta doklip titi. Bonta Karbi Anglong pachingthur aphan industry lapen devak abiri heihui along ke kehangdun thap pen pachilut vok-vok do-o. Madu arat ta chini pame chokam amo jongsi chingthur the pulote longri ke chingthur un eh. Seta non ke thetan asai keklemji aphan Karbi Anglong vanghai vangve. Kachongdat kelongji adim devak katiki heihui along ke lam pahancha dunthap pen kapasiksak ajok pachingthur un eh. Lasonsi kachingthur ahin dam nodak titi. Lahai ke song ke-ong pen donation kehang atum ke-ong, jasemet pet ke risim kangtang ke-ot asong lapen amen pen kalile thang bakbe atum kehangdun thap pen kachomatha dun thap. Lasonsi rat atum ta keraidunji kalisi kangri-kangkrang pen kapasiksak dun thap heihui dopik. Lasi song keseng pulote non amat ili kethekdun long ke kopi lo. Ke-ong nai ke government along kachoton lapen kehang iji aphan adai kachepinchongsi ke-ong. Khei-long achokam amo lapen monsam aphan lapen ahokpet aningklarsap pen corruption kenepdun puke thek longle. Athe nep dun po, RTI jokdun po seta angthek abang ke tangka pen palar det. Amutpi ke komat lo kahanokji ke? Lasi song akemang abang kaike ta government aphan kachoton lapen akerap kelong nangji an long ma longle pu asong chot ke kali det nangji. Song akemang ateng pen keklem abang ning klarsap pensi klem nangji lapen tangka kapalar pu abang avet det nangji. Song akemang abang ke rat atum kosonsi voreng avarsai kelongji, kosonji employment generate ji, kosonsi economy kapabatji pu heihuisi jasemet pet ke mang nangji. Lahei keklem along isi ning kachibi nangji ke donation kirung pen hen lo monit tum aning kasiksak-i. Lasi donation rungre pin pen sai amo kedeng hen lo akemenai. Lasi ahokpet kachesong asongja ahem ke plang-o puke thek longle. Seta hala keplang-i arjap song puke kero-o eh atumsi ke-ong lo. Latum thekthe puke neli pupe seta keklem abang konatne contract, supply lapen tangka pen palar ke do po lapen lahai atum ke arjapthip monit atum amahang langsap pen ke chesong haihe lapen chesongse lo. Lasi lahai pen ta pangthek me-o. Lasi komat asong koson puke asong amonit lapen asai along pensi lang nang po.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives