ADVERTISEMENT

This area is available for advertisement. Please contact for details.

Arnivang
Get Adobe Flash player

Son pli aphuthak Sarbananda Sonowal aphan kapanong apinpur aloh DC arideng KSA atum kapajir

Our Correspondent
Hamren, Thekar, Vosik 12:
Karbi Students Association (KSA) – Hamren District Committee atum patirpisi atumidik Vosik 10 arni adap porphai 11:30 pen Hamren hithi ban along kedo Rongbong Ronghang pathu aklam along chingrumsi KSA akemang alam aphuthak penang-an chethan-chimum.
KSA Hamren District Committee ameiphu Bishnu Teron kachepahemphu amai along chunbang Proshanta Teron mai kepha alamthe jai lo.
Inut pen inut KSA akemang alamthe chethan-chemum det aphi bang pharo krepho sose loh charli a osomar atum Km 3 adak armu chejengsi West Karbi Anglong Deputy Commissioner asaihem along pinpurme aloh kapajir damji aphan palelo, seta DC abang kavedet ajok Additional Deputy Commissioner Anil Chandra Das aridengsi pinpur aloh pipajir tekang lo.
Pinpur aloh along KSA Hamren District Committee kejong dun ke, Karbi MIL subject Secondary Education Board of Assam (SEBA) along palut dun nangji, charlitum aphan puthot kai ateng Karbi apindeng pen school ahem pachethang long nangji, primary school angdeng along Karbi subject loh thanbang arpu pek nangji lapen National Highway 36-39 tovar kevak salok serak nangji, Baithalangso-Hamren-Khanduli kacheleng NEC atovar kaselam patangserak nangji anparta tovar kaselam mesen nangji pu aphuthak pinpur aloh along jong dun.
State ratpangri PWD asaikam kelang a minister Dr. Himanta Biswa Sarma Baithalangso pen Hamren adak cycle nangvek tha, la-an lote tovar kaheno alam chinipo pusi KSA ameiphu Semson Teron pherangke atum athengno ningje.
Akaprek ahavar tovar keme ason Hamren rongsopi West Karbi Anglong district aphanta nang langtha puta jong.
Armu chejeng asai along KSA Hamren District Committee ameiphu Bishnu Teron, dun meiphu Rensing Rongpi, sankur chunbang Prashanta Teron, sikdang chunbang Sarthe Ronghang, rap chunbang Angtong Hanse pen Amrita Beypi anparta kaprek-kaprek song klembang atum chetong dun.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives