ADVERTISEMENT

This area is available for advertisement. Please contact for details.

Arnivang
Get Adobe Flash player

Saitsema pen Khanduli anat Km 6 sose Karbi Anglong alongle Meghalaya nang kacherai

Staff Reporter,
Diphu, Thekar, Vosik 12:
Karbi Anglong district hini pangrumpet kado 10,434 sq Km alongle adang do pusi Karbi Anglong akethe-kiding pen chenglok kado kave atumta chini, seta Karbi Anglong adang la-an do puke bohi kolom anchot po asonsi thek long.
Assam along kedo Karbi Anglong a district hini state pen kachepahoi do, Karbi Anglong district pen Nagaland lapen West Karbi Anglong district pen Meghalaya state chepahoi dun lo.
Laso ajoine ahoi alamki kijutjesi man. Lason ahut Karbi Anglong, Assam lapen Meghalaya Jaintia district ahoi ta kaike ta lamki jutje det thek long. Pinpurme, Jaintia Hills district pen kachepahoi lapu Socheng constituency arlo ta Karbi Anglong alongle Km 6 sose Meghalaya atum nang cherai et lo pusi ahoi kedo Border Police Out post lapen Socheng Amreng Border Area Development Adhoc Committee anparta ahoi kedai kedo arat atum nang than dun.
Pinpurme, Saitsema pen Khanduli nang kijut Langhemphi adung an Km 6 sose Meghalaya atum nang cherai det lo. Non amat Karbi Anglong a gate Saitsema along dolang seta do pajoi asonsi man lo athe Meghalaya atum longle nangpetsi ladak Langhemphi adung ansi Meghalaya a gate nang parjap lo.
La-an chot kali Saitsema pen Khanduli nang kijut Khanduli Border Outpost adung an ke Karbi Anglong pule chipu seta longle a patta anta Meghalaya ratpangri atum pensi pi-et lo. La-an chot kali state dispensary nang kikim pen chenglok angton penta Meghalaya asor mate Khasia atumsi plengset lo.
Inut bang hini atum nang kethan dun ateng ke inut David Rongphar pu a Karbi Khasipi ke-en ajoine adon-arap atum aphan a Khasi atum aphan chipibomsi non anke angton Khanduli malom alongle do-an Khasi atum ahemphu mandet lo.
Lapu Langkeroi anatthu ta Meghalaya ratpangri atum aphi dodunsi Khasi sankur arat atum vang pen Assam ratpangri mate hin-hin a ratpangri atum chedonsar pen kesom a pillar ta pangbopsi pajir et lo pusi Langkeroi ahavar kahumri dam ahut VDP ameiphu Obiwel Timung nang pachini dun.
Karbi Anglong mate Assam ratpangri atum pen phong ni anbak langdam lo. Lason thakthak Border Outpost along kedo a police atum ke arnivang kali puseta penang an kachelangdam do puta than.
Laso ajoine Khasi atum ajo jirlo vangsi lapuson pillar kapangbop asai keklem puta than. Langkeroi lapen tebok-terai ahavar along kado kave pillar 5 anbak do seta kedamtang 2013 aningkan malom Khasi atum kapanghang et ajoine non ke Langkeroi arong amekar Obiwel Timung atum kachotiki ahidi along isivetsi do chot lo. Lason thakthak isi kapanghanghe a pillar dolang seta halake Khasi a monit atum ahem arlo sido puta than.
Langkeroi arong along non amat don trok kep sose adon amekar do puta alangli VDP ameiphu Obiwel Timung than.
Khasi atum amethang alongle pu kachekrong det ajoine Langhemphi kedai Khanduli malom Assam ratpangri atum pen rihing ameh arihing kihing damji aphan keklem anta Khasi atumsi khang dun et lo. La-an chot kali Langkeroi lapen Moikoram anatthu Assam Karbi Anglong atum pen tovar kaselam kapangcheng ahutta aphong-aphong Khasi atum kekhang dun dolo seta aphi chingki-chingvaisi tovar selam longlo pusi Socheng Constituency a EM Rupsing Teron pherangke atum aphan nang pachini dun.
Lason ahut ahoi kapatongji aphan kibi a BOP aphan ta Assam ratpangri atum pen thangnat avarsai kipipe, BOP along amatta lang ave, rihing ameh kave lapen kedo-kethak aboha ta kejokvan kali pusi BOP IC Narayan Laskar nang chethan dun. Laso ajoine alanglitum kijun alang ke Khasi atum alongsi cho-en dun nangkok lo puta chethan.
Lasi Khanduli along BOP alar thana kaselamsi kemeji puta alangli ning kehang alam pherangke atum athengno nang chethan dun.
Laso aphuthak West Karbi Anglong a SP Mrinal Talukdar kethan ke laso a BOP along kaprek-kaprek kemesen avarsai kipiji aphan project amokha kedeng pontang lo, lasi prapjin pen longpo’. BOP along ke gari kipi aron aprang penta ave latum patrolling damji puseta akeng pensi dam nangji puta SP than.
Socheng-Amreng Border Area Development Adhoc Committee ameiphu Augustin Hanse kethan dun ke, Saitsema pen Km 6 an nang cherai etlo, laso nang kacherai det Karbi Anglong alongle along Meghalaya ratpangri atum dispensary, LP school, BOP heihui ta nang pangni lo. Jio Tower, ME school, tovar, border pillar lapen cannel, Moikoram along community hall, water harvesting heihui asai 1995 aningkan malom pensi Meghalaya atum lahai kachingthur asai Karbi Anglong alongle along nang klem lo.
Laso ajoine Karbi Anglong aratvek atum ke penang an akasiksak do lo, lasi ahoi alamki aphuthak Assam a chief minister Sarbananda Sonowal lapen Karbi Anglong Autonomous Council a chief executive member Tuliram Ronghang atum ahoi along nang humrisi lahai Khasi atum nang kacherai et alongle puthot Karbi Anglong atum kachelong thuji aphan kemesen asai klem nangji pusi Socheng Amreng Border Area Development Adhoc Committee atum pen kachoningri alam pherangke atum athengno Augustin Hanse nang pachini dun.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives