ADVERTISEMENT

This area is available for advertisement. Please contact for details.

Arnivang
Get Adobe Flash player

KNP kapangdang along kaparlo pondet Duarbagori pen Sochengdhenta arat kisung kepho aphi-ong lit ong lo

Our Correspondent,
Dolamara, Thekar, Vosik 12:
Supreme Court pen Kaziranga National Park kapangdang alam lamrai pilo. Laso ahut Karbi Anglong Autonomous Council kachari Duarbagori constituency pen Sochengdhenta constituency angkang kethedung adang ke Kaziranga National Park along parlo pondet lo. Laso ajoine Duarbagori constituency arlo Dolamara ahavar pen Sochengdhenta constituency angkang Rongmongve ahavar kedo kado kave pangrumpet bang suri 60 sose arat atum kisung chechak nang lo athe KNP kapangdang along kepho dun ahavar arat atum kerengji aphan kachoklem avarsai ave det khang lo. Sangti pen arlong kiphur longle pen chenglok sai katiki longle lapen hem kachikim chorangji aphan thengpi erong kipipet longle det ajoine havar arat atum akisung arnivangsi nang batbom thek longlo.
Laso aphuthak havar arat atum pen aphong-aphong akisung alam chethan lo, seta Council kachari CEM, EM atum pen chenglok state ratpangri along kedodun MLA, minister lapen tiri ratpangri along kedo dun MP atum antame karju abang kave det akisung aphi-ong bat-ong lo.
Lasi non akimi a MP Horen Sing Bey lapen ladak Council kachari CEM Tuliram Ronghang atum havar arat atum akisung alam aphuthak birta nang en pen kado kave akisung alam tiri ratpangri lapen kaprek-kaprek ajakong kedo atum pen nang chingki-chingvai pinangji pusi havar kedo kisung kepho arat atum choningri.
Pinpurme, bang suri 60 sose kisung kepho atum ke Karbi asaide pule pudet seta kechokche kali lapen lahai a Karbi arat atum nonhet penle lahai ahavar along kedo kalilo, bonta Kaziranga National Park selamle ako pen kedo atum lo. Lasi ningkan ko-an lone laso ahavar along dodet aphi non apor lapuson akisung kepho nang ke ningduk meme binong puta rat atum ningri.
Kedamtang arni anke methang alongle along sok lapen kaprek asai kachotiki anparta sangti arlong kachophur heihui asai klemsi methang ahemtun chepangreng bom lo. Seta lapuson kado kave kerengji aphan kachoklem asai an kekhang chek ajoine havar kedo arat atum kerengji aphan kisung thedung anpin lo.
Lasi havar kedo Karbi arat atum aphan reng nangji pu jongsi Karbi Anglong a arleng kethe atum matha pulote angsong kangtui angdeng antame nang chingki pi nangji pusi havar kedo kisung kepho arat atum choningri.
Jongsi lapuson kachisung nang pachechak bom pulote rat thurpak kachesong asai tame deng nangkok po lapen laso kachesong ahut National Highway tame rangkhaji puta havar kedo ongdung arat atum chingkrin.
Pinpurme thume, Karbi Anglong Autonomous Council atum penta Supreme Court along kachongri aloh kipitang ta do lo seta pini arni anta laso aphuthak SC pen thangnat alamrai kepangdak thu kave det lang ajoine havar kedo kadure det arat atum abang kisung kachechak nang ajirding bom asonsi man lo.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives