ADVERTISEMENT

This area is available for advertisement. Please contact for details.

Arnivang
Get Adobe Flash player

State ratpangri atum pen KAAC arveng nang ingtip bom lo: JACAS

Staff Reporter
Diphu, Thekar, Vosik 9:
Karbi Anglong lapen Dima Hasao District Council ajakong kapabatji aphan pusi Sixth schedule aphan arkanke pinsi kedamtang 1995 aningkan Jangmi 1 arni Assam ratpangri lapen Autonomous State Demand Committee (ASDC) anparta kachelang rappet asong atum angbong Memorandum of Understanding alamdon chetok lo.
Laso ateng Assam Legislative Assembly along amatta 1995 aningkan Pre achiklo 12 arni chingvai chingsai pen cheraisi MoU aphan deng pame lo. Laso ateng hini inglong a district phan MoU ateng saikam 30 ajakong nangpi det lo. Aphi 1996 aningkan Matijong chiklo Office Memorandum, No. HAD.57/95/309 dated 319 ateng kosonsi kachari nangji aron atang kelar asai tame klem lo.
Laso ahut Under OM a clause (i), ateng “bainong lapen Principal Secretary anparta Secretaries/Deputy Secretaries, lason thakthak Council pen kepek asaiphu, saikhi atum aphanta Council pen kipi nangji ason bainong (allowance) heihui pipo, laso aphan kenangji atangka ke Council aphan State ratpangri pensi pador dunpo”, seta non ke letter No. BB. 28/2019/43 dated 27th dated, 2019, Assam ratpangri atum aphi chirui pen lar thapsi Karbi Anglong Autonomous Council aphan kipi tang ajakong kachepon asai klem lo.
Lapuson Assam ratpangri atum keklem alangli tum methang kaselam OM lapen MoU alamdon aphan karkan lo, seta laso aphuthak Karbi Anglong Autonomous Council atum thangta klemdunde pangkreve asonsi thek long.
Inglong hini arat atum chepadukkrup pen kelong ajakong cheharjak thekthe detsi isi pen isi state ratpangri aphan chevoi thu-et asonsi thek long.
Online bainong kipiji pu along netum thangnat kipu dunji alam ave, laso asai pen ajok ajahak tangka maha jokpo, seta laso keklem along Council aphan kipitang ajakong aphan thangnat kapanahok avedet nangji. MoU ateng kipitang ajakong do-an KAAC atum ajakong cheharjak long nangji pusi JACAS atum kejong paso.
Laso aphuthak kipitang ajakong aphuthak Karbi Anglong Autonomous Council ajakong kedo atum amethang konatsi karjap ma rat aphan chepaklang nangji.
ladak kedo amonit atum ajakong (Regional autonomy) kenangsot lapen Autonomous State henlo kisung do-an pen ajirdingklui aphan Karbi Anglong lapen Dima Hasao aphan kapajokji puta JACAS atum jong pusi JACAS vice chairman Stalyn Ingti birta pachetak.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives