ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi keraiji aphan MP, MLA, council kachari atum klem dun nangji: ASDC

Staff Reporter,
Diphu, Thekar, Vosik 9:
Kedamtang erui angbong Meghalaya state ratpangri pen ahoi nang petsi tovar kaselam amen pen havar nang kaparlo asai klembom pu birta alo along lapen social media along klangthu lilo. Seta Assam HAD Minister Sum Ronghang lapen Baithalangso MLA Dr. Mansing Rongpi atum kekhamkhe dun alam kaningje arju longle lang. Alanglitum banghini ta kekhamkhe dunvek nangji atumlo. Neli KAAC, CEM klembom ahut 1998 aningkan Dr. Henry Lamin Meghalaya a Cabinet Minister aphan Mukro-Sometan ahavar pen plungjui thek pulote, Karbi Anglong pen a Karbisi HAD Minister, pipotsi bang ahoi nangkepet khamkhe dun thekthe detma?
Dr. Henry Lamin aphan plung det aphi neli CEM klemtik an ahoi along nangkeklemtap asai Meghalaya lapen Nagaland penta nangklem haihe pin lo. Atheke minister aron arkan det apotsi plung nangkok lo. Lasi minister along nangkedun Superitendent of Police Jirikindeng along an nang dunsi diya nangchohang nang koklo. Athe diya nang chehanghete action kapa-enji aphan neli criminal case pipo lapen India a President pen Union Home Minister aphan lo tok det po.
Lasi, HAD Minister pen chenglok MP, MLA lapen CEM lapen EM atum jakong chepangtangsi longri cherai pame nangji pusi choningri lo. HAD Minister lapen MLA atum Inter State Border Areas development a fund hang dunsi ahoi akung kedo arat lapen a havar kapachingthur asai klempi nang po. BJP a tumsi Diphu, Dispur lapen Delhi anta government chedonthor lo, lasi Am-ih arong along kedobom Maghalaya a Border Outpost (BOP) unlo. Katerekji aphan HAD Minister, MLA lapen MP atum aphan choningri padikrim lo.
Neli CEM keklem bom ahut Assam Government pen chingvaisi Langhemphi arong along kedo Assam a BOP Khanduli arong along an terek det lo. Meghalaya BOP katererkji aphuthak Union Home Ministry aphan chingvaisi joint survey – Survey of India, Assam Survey lapen Meghalaya Survey pasunsi 1951 aningkan kapathir ahoi puthot ‘chain pevungpo’ pusi Union Home Ministry kroi lo. Seta, Dr Jayanta Rongpi halaso ahut MP lapen ASDC a president nang kapasiksak pen ajok pechun un e detlo. Ningkan 20 aphrang Manipur state arlo Nagaland ratpangri pen BOP bidamdet do lo. Aphi Union Home Ministry kroikre det ajoksi Nagaland ratpangri a BOP terek nang kok lo. Lason thotsi, Union Home Ministry aphan chingvai pesiklote Assam West Karbi Anglong arlo Am-ih arong along aronre pen nang bikok Meghalaya a BOP ta terek unpo. Bangso a BOP nang kibi cheng ahut Karbi Anglong pen Minister, MP, MLA lapen Council along keklem atum jongsi ingtangrak, klemhai lapen klemthek asonte BOP nang bilongle detji. Sita, pheredunju apot bilongpoplo.
Karbi officer atumta khei kangthur lapen longri keraikom asai keklem along cherap dunsi keme. Methang kereng aphan klemchotke khei chingthur un e detpo. Lasi, Karbi a rat apharman bangphu lapen Karbi asaiphu atum cheraprinsi longri lapen keboidet Karbi a khei aphan kerai lapen kangthur asai keklemji aphan choningri padikrim lo pusi ASDC sankur chunbang CEM barim Jotson Bey birta pachetak.

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives