ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong arlo kechengsi Dhub kaselam akor kangpu

imageStaff Reporter,
Diphu, Thekar, Vosik 2:
Charisma Rongpipi kachepatirpi Yellow Grass Enterprise pen ke-ir Meraki dhub kaselam akor pini Vosik 2 arni Karbi Anglong Autonomous Council a CEM Tuliram Ronghang arideng pen kapangpu.
Pinpurme, Karbi Anglong a district arlo Meraki a dhub akor hen lo kechengsi pu jong dam un. Charisma Rongpipi kachepaduk lapen ke-otthip ajoine pini an alangli kemang chepachun lo. La-an chot kali alangli laso akor kangpu ajoine havar along kedo penang an atum jasemetpet arlosomar atum kachongdat dun avarsai longlo.
Pini KAAC Secretary Si-im Taro kachari amai along Karbi Anglong Autonomous Council a CEM Tuliram Ronghang alohi sarpo aman pen chetong dun. Mai along KAAC Deputy Chairman Ritesh Inghi, EM Prodip Rongpi, EM Mongalsing Timung, MAC D.U. Maslai, council secretary Micheal Timung, PHE EE Bikrom Teron, tokbang Pabitra Bora, DTC chairman Rah Kro atum pen chenglok akprek kaprek man kedo bangphu-phi anparta DICC asaiphu saikhi atumta chetong dun.
Laso akor kapangdang bom thekji aphan saikam pen akerap dun nangji ason do-an cherap dunpo lapen neli CEM jongjung penta kopine kacherap dun nangji ason do pulote cherap dun po pusi CEM Tuliram Ronghang chechak tekang.
Charisma Rongpipi lapuson amethang jongjung kachebor-i pen Karbi Anglong arlo kedo kithurmi a-ove atum aphan isi akeme akrong kapakleng thek apot Karbi Anglong arat apharman CEM Tuliram Ronghang kachoro pajir. Charisma Rongpipi keklem ason thakthak Karbi Anglong arlo kaprek kaprek atumta klem dunsi kaprek kaprek industries ingpu nangji lang. Jongsi kor heihui do-oh pulote voreng avarsai kave akisung penang anke chunpo puta CEM Tuliram Ronghang jai.
Saikam pen kacherap dun nangji kedo-an ke cherap dunpo pusi EM Prodip Rongpi tame rat athengno lamchak pi tekang.
Kedamtang 2016 aningkan pen laso aphan keklem pangcheng lo, laso ateng kaprek kaprek katarlip asai klemdet aphi Karbi Anglong a chek hen lo India angbong kemenai a chek, la-an chot kali ITC pen apun achak asatlang pa-en lo. Neli kaselam a dhub along ke thangnat chemical kapangvui dun ave, laso kaselam akor along kado kave bang 30 anbak asarpimar atum aphan pachongdat longlo. Lason thakthak ajahak pinsomar aphanta pachongdat longlo. Lasi loh kethek ariso okorjang atum chokomar aphan chonghong ding nangne neta DICC pen akerap cho-ensi (DICC sponsored bank loan) laso asai keklem pusi Meraki Dhub akor ahemphu Charisma Rongpipi chethan.

One Response to Karbi Anglong arlo kechengsi Dhub kaselam akor kangpu

Leave a Reply

Your email address will not be published. Required fields are marked *

June 2019
M T W T F S S
« May    
 12
3456789
10111213141516
17181920212223
24252627282930
Archives