ADVERTISEMENT

This area is available for advertisement. Please contact for details.

Arnivang
Get Adobe Flash player

Karate kapathu ahin Karbi akhei aphan nongme kevan Suniram Ingti aphan karcho

Alangliphan Japan along kachepate aphan ingvai lo seta tangka kadure pen dun longle det tahai lo, kerap aphan tovar kacholang

A Correspondent,
Diphu, Thekar, Aru 20:
Suniram Ingti Karbi arat aphan nongme kevanpi thek apot Guwahati Karbi Students’s Boys Hostel along karcho.
Guwahati Karbi Students Boys Hostel a monitor Linson Ronghang kachepahemphu karcho amai along rap monitor Bicky Sing Tisso, GGKSA ameiphu barim Dhorom Sing Ronghang atum pen chenglok hostel along kedo akorte do-an atum karcho amai along chetong dun.
Guwahati Karbi Students Boys Hostel along Suniram Ingti aphan Karbi apoho pen mir atelup heihui pensi archo lo.
Karcho amai along Suniram Ingti lapen Karbi Hostel along kedo loh kacharli bom aosomar atum angbong penang an akenangsot alam heihui chingki-chethan. Lason ahut Suniram Ingti bihek pen loh kacharli lapen Martial Arts kacharli heihui alam chethan dun lo. Suniram Ingti ahem ke Borolanglai, Umrongso, Dima Hasao district. Alangli po amen Jongdang Ingti lapen alangli Himalayan Academy, Umrongso alongsi ingdeng 5 an charli dun lo lapen ingdeng 6 pen 10 anke puthot Vivekananda Vidyalaya, Umrongso alongsi charli dun lo. Alangli bihek penta karate alam arjan langpik lapen aning hang pik. Lasi alangli Vivekananda Vidyalaya along loh charli bom ahut tame ongdeng 8 kele ahut pen ke Martial Arts charli dun pangcheng lo. Alangli akangtui angdeng loh kacharli lapen Martial Arts kacharliji aphan Guwahati rongsopi an vang lo. Alangli po lapen alangli pei voreng kave ajok degree angdeng abang open pensi Pragjyotish College, Guwahati along charli dun bom lo. Lasonsi alangli Martial Arts ahin ta Maligaon along Grand Master Sanjay Kumar Das along charli dun bom lo. 2018 aningkan alangli Chennai along an ta Martial Arts charli dun lo. Alangli kemang lapen kacharli kemon-eh ajok alangliphan 9 angdeng South Asian Hakaukai Karate Championship, 2019 along Assam angkang pen alangliphanta ingvaisi chepate dun longlo. Alangli kabor-i lapen alangli kopai keme ajok Jangmi achiklo 28 arni 9 angdeng South Asian Hakaukai Karate Championship along Bronze Medal mate kethom angdeng anong-eh long dunsi Karbi arat aphan nongme van pi lo.
Puthot alangli Martial Arts ahin kacharli kemesen ajok non kevangji Paipai achiklo niphai 3 arni World Shito Ryu Karate Championship, Hyogo, Japan along amen ingvai pon thu lo. La-an chot kali non kevangji Paipai achiklo 23 arni World Hakaukai Karate Championship, Japan along aphan ta baitai hini aphong kapachepateji alongta puthot amen chethap dun thu long lo.
Alangliphan Japan adet along kachepate dunji aphan anta ingvai lo, voiphit tame tangka maha keboi ajok alangli chepate dun longle det po bon pusi ningri lo. Lasi komatne nang kerap dunji aning kehang abangphu bangphi atum jongsi do pulotangte alangli tum aphan ning aklong pen choroji puta langli Guwahati Karbi Students Boys Hostel along kedo loh kacharli bom ajirpomar atum aphan chethan tekang pusi GGKSA ameiphu barim Dhorom Sing Ronghang birta nang pale.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives