ADVERTISEMENT

This area is available for advertisement. Please contact for details.

Arnivang
Get Adobe Flash player

Inglong aso kali det atum pen kachepangri arloso atum aphan longle ajakong ingthan pet nangji: AIKSU

Staff Reporter,
Diphu, Thekar, Aru 20:
Inglong aso kalidet pen kachepangri arlosomar atum aphan inglong aso pu kipi kapangthek aloh ingthan nangji. Assam state arlo kedo inglong aso kalidet atum pen kachepangri arlosomar atum aphan longle aphuthak ajakong pipe det nangji lapen alanglitum aphan inglong aso pu kapangthek aloh (certificate) ta ingthanpet nangji pura AIKSU pen India PM minister aphan kido aloh kapale.
Kilu det inglong aso akhei arlosomar atum Muslim, Bengali, Bihari, Nepali, Bangladeshi, High Caste Assamese, sah katiki akhei lapen Marwari, Panjabi atum aphan kedo ajoine Assam arlo kedo inglong ahavar a inglong aso akhei atum akisung chechak nang lo. Inglong aso kali det akhei atum aphan inglong aso arlosomar atum kedo pen ajok isi aron kimi nang keklang asonsi mandet lo. Lapuson keplang ke inglong aso atum a fundamental right lapen human right aphan ro dam klok lo puta jong dun. Ongdung inglong aso akhei arlosomar atum inglong aso kali det akhei atum pen kachepangri ke-ongpik ajoine non apor inglong aso atum a pangthek (identity) kachingbo detji akrong anatsi dam bom lo.
Laso ajoine langle, aron-atang, lam lapen chokamar heihui along anta inglong aso akhei atum aphan kaphere asonsi dotang lo. Laso kachepangri kachepadon netum ningdokde athe khei aphan isi kethedung kanahok dovek, lasi laso aron ajutang kekhang pen inglong aso atum aphan pajok nangpo.
Laso ateng inglong aso akhei atum aphan kapajokji aphan khei-khei angbong kachepari-pangdon aron pavir nangpo. Inglong aso kalidet jasemetpet Muslim, Bengali, Marawari, Panjabi, Bihari atum pen kachepangri padeng longle det nangji, inglong aso kalidet pen kachepangri inglong aso akhei arlosomar atum alongle ajakong pave det nangji. Inglong aso kali pen kachepangri arlosomar atum inglong aso pu kapangthek aloh (tribal certificate) ingthan et nangji puta AIKSA atum jong dun pusi AIKSU ameiphu Enush Timung pen Bikram Hanse atum birta nangpale. Inglong aso akhei arlosomar atum methang inglong aso hijan kachepangriji aphan kedeng nangji asai ta AIKSU atum jong dun. Alanglitum kejong dun atengke, inglong aso akhei angbong kachepangri arlosomar atum aphan tangka akereng Sika lakh 5 pajir nangji pusi pangdak nangji, inglong aso hijan kachepangri kadure det arlosomar atum aphan chokamar anghoi ta thik pi nangji, inglong aso aphan kachedode inglong aso arlosomar atum pangri ahut amen pachethap longle det nangji, kekroi atum aphan ningkan adai en nangji.
Deputy Commissioner asaihem along amat Tribal Women Welfare & Marriage Department selam nangji, inglong aso kalidet akhei aphan kedo a inglong aso arloso aphan chokamar anghoi ingthan pet nangji, laso aphuthak kapalangchari pameji aphan angsong angkangtui angdeng along anta pale nangji pu heihui alamta AIKSU atum pen PM aphan kelo aloh along jong dun pusi AIKSU a sankur chunbang Bikram Hanse birta nangpale.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives