ADVERTISEMENT

This area is available for advertisement. Please contact for details.

Arnivang
Get Adobe Flash player

Hemprek aphuthak kachelarvoi ajoksi ratpangri atum cherai thekthe det lo: Biren Sing Ingti

imageStaff Reporter
Diphu, Thekar, Aru 20:
MP kilik angthek klangji dokdok apor ahut pherangke atum kikhi bom MP Biren Sing Ingti pen chingki-chethan dam.
Laso ahut MP Biren Sing Ingti kaningje ke, ‘inut bang hini kachini muchot atum kelakha ateng pulote non aphong kilik ke Congress si haiji’. Jongsi haidet pulote inut a MP kopisi keklem nangji atengsi nelita klempo lapen kedamtang arnita lason thakthaksi neli klem lo.
Assam arlo kedo MP anghoi 14 angbong pen Indian National Congress (INC) atum inghoi trok an longji puta alangli ningje. State aphuthak alangli kaningje ke, ephongsi state kehang along cherap dunji pu chechak tanglo, lasi neli dotik ke state kehang along ke do dun verpo, seta Karbi Anglong arlo ke-ongdung ajabang atum state alam ke apor ahutsi ningje chot lapen klem chot, apor pen ke tengne det titi. Autonomous state kehang along cherap dunji pusi netum ningje tang lo, laso atengsi netum ke kaike ta arjap thip lo.
Mentune ke autonomous state nangji mentune ke nangne pusi Karbi Anglong ajahak ajabang atum ke kaningje, la-an chot kali ahut pen autonomous state lapen ahut pen ke separate state si kenangji pusi kaningje, laso ajoine non anke state kehang ke kilik ahut ratchari ale kelongji aphan isi alamthe (issue) asonsi mandet lo.
Kehang kechokjam ajoine tiri ratpangri atum anta Karbi Anglong arat atum kopisi kenangji manghu thu-et asonsi do lo. Ajahak asong lamdon kachetok ahut state nangne lo pusi putekang lo seta aphongtin kilik ahut ke state alam pensi kilik pathu dun bom lo. Private member bill neli pabon lo seta BJP ratpangri atum pen laso along akerap ke longle detji.
Boro atumta isivetsi hangvet seta Karbi Anglong arlo ke state aphuthakta hangvetvesi chokjam dokok apot tiri ratpangri atum angbongta ajahak atum laso aphuthak kaningje atum do lo. State aphuthak neli parliament along paklang dun lo seta laso aphuthak neliphan lam kaningje dunji aphanta apor nangpipe det lo.
Karbi Anglong pen NC Hills along tiri ratpangri pen tangka nang kapale kedo-anta neli keklem apot lo, la-an chot kali state arlo kaprek-kaprek parlimentary constituency kedo-an angbong neli constituency aphan hen lo tangka ke-ongnai. Laso ajoine ajahak a MP atum ke nang kachopatin atumta do lo puta alangli than.
Bodo atum aphan ST(H) kipiji pu alam ke aprangsi pensi kacheparai tang alamlo, seta non nelitum jongsi puthot kachari ajakong chelongthu pulote neta kopine-pena klem dunpo puta alangli ningje. Laso a bill ke Bodo atum aphan chot kali bonta laso a bill along Karbi atum aphanta ro ponlo. Bodo atum aphan ST(H) kipi asonthotsi thoi along kedo Karbi atum aphanta ST pipon po. Inglong along kedo a Karbi atum anparta thoi a Karbi atumsi ke-ong lang seta latum India kejokvan kedo pini an ningkan 70 sose lo anta latum ajat a category alongta pho dunde, Boro atum aphan ST(H) kipiji pu a bill along thoi kedo Karbi atum aphanta ST status kipiji aphan jong pon lo.
Nephan ke mek kejang a MP pusi nangpu lo, seta National Highway pen kechenglok radio centre, TV centre, Railway lapen kaprek-kaprek central pen nang kipi ason do-an ke ne MP kikhi ahutsi kevan lo. Neli jongsi mek kejang dun chot a MP pulote lahai thangta long dunde det lapen chini dunde detji apot lo puta MP Biren Sing Ingti pherangke atum athengno nang ningje dun.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives