ADVERTISEMENT

This area is available for advertisement. Please contact for details.

Arnivang
Get Adobe Flash player

Kacharli ahin pachingthurji aphan KAAC pen danglok saiphu atum chepadukpik nangjilang

Ha kecheng pen ta Karbi Anglong ke kacharli ahin kapaprang dun puke ave, kaike ta kapaphi saide. HSLC pen kelang pangcheng pulote angdeng ta kaike hini kali te kethom along dover, lata aber anat pen. Lasai lahai angthek kapaphidun ke KAAC aphan men-men sorsar varet puke ahokpet pen ke kalidet nangji. Athe Karbi Anglong a Education System amatsi meme. Kechengsi ke government a school amokha aphan kelang kapangching non pen phan thom-pli anbak pakam tetik. Kapachingthurji aphan pura KAAC pen ta a policy ke deng lo, seta laso policy alongta kapalengji aphan keklem (Implementation) along chokche. Athe non kedobom school kapalangdunji aphan pura School Managing Committee (SMC) seng lo seta ladak ta akechokche thekdam long. Kechengsi ke SMC along chunbang arpu thanbang aphan kipi lapen meiphu abang ratchari amonit aphan kipi,ladak henlo kechengsi akechokche kethenai lo. SMC achunbang jongsi thanbang pulote kopi lapen komat athanbang aphansi kenep po? Thanbang hijan ke kaike ta abesi chedun po, lason thakthaksi SMC ameiphu jongsi (kaike keklemver ajutang) ratchari amonit pulote lake ratchari amek pensi langvek po. Hala kaike school kachedamdede athanbang jongsi abe kidun athanbang pulote lake jonghe le heno seta nepne lo, lasonsi non kedambom apor anta kethek long-long. Lasi non abang ke chunbang arpu ke inut neutral lapen ketok-kelang kemesen lapen ketheser amonit, jasemet ke Educationist aphansi chunbang arpu pek nangji. Lasonsi meiphu ta school kaparlo angkang angbong pen inut arta kedo muchot politically neutral ratsaiklembang (Social worker) aphansi pek nangji. Lasonsi klembang atum aphanta thek muchot- re muchot atum aphansi pek nangji. Laso angbong school along kacharlivek apo/apai aphan ta ponvek nangji, laso angbong arloso ta dovek nangji. Lapuson keklem pame aphi thanbang school kachedamde lapen kethan ahok kave, damchit ahut puseta a Timing pu alam ke ave pin lo. Aning hang aling kedam lapen ahing kehang aling class kapajut lapen holiday kipi. Thanbang ahem jongsi kopene do pulote lake school ke ave lo. Lahai hen lo non akethenai kelang nangji angdeng lo. Laso angbong school ihum along thanbang inutvet lapen apor ateng pen kitap kipipe. Lahai ajoinesi rong malom a school ke ingdeng pli-pho kele anta reading pu anta thek pameme. Lahai a osomar reading anta thek vangve pulote koson pensi kabuji pame po? Lake angthek keme po aphan ning the un eh. Lason Foundation mate a Base along jongsi ingtangklong kali pulote mo akangtui angdeng along ta meme lo.
Non kedambom SSA pen aron kithik along ajahak kelangdam nangji abang kethetan do. Thanbang atum aphan seke kipi along la inutvet athanbang kedo adim along ke vacation kalite holiday arnisi lason-son athanbang atum aphan ke seke pi nangji, kali pulote class ke mam lipo athe school along inutvet-bang hini vet athanbang school ihum a osomar Nursery pen ha pho angdeng an kethan ke ko ansi pachetang thekji? Arnisi along thanbang abang jongsi kithik apor ateng than puseta isi-si a class along ko an aporsi than unji? Lahai along RTE aron kaparo chot kali, kelangchari dun nangji abang henlo akethenai lo. Laso arpu ke Block asaiphu atum ke arpu thepik lo. Lahai along api-apo atum arpu ta thepik. Athe osomar atum school along pen mute hem kedo nangji aporsi ke-ong. Dak Karbi Anglong angkang, jasemet Karbi atum ke osomar atum kaporhi along kachelangdunji aphan selet pik. Kachongdat nang pen apor kave ta eson lo seta osomar aphan ke ajat pen non asapso bak ke apor chipi vek nangji. Apor kave lapen tangka kadure angbong pensi padam nang po. Lason pensi majok ta damhur lo. Laso kachingtang un atum ke chingthur lo lapen plang lo. Lason masapso kachepaduk un eh atum ke duk lo lapen kachongdat aso cheman lo. Lasi bangso apirthe along lason apor kelong ke alomsi nat. Laso apor matha pame pensi padam thek pame thekvek nangji. Lason et lote Karbi Anglong chingthur po.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives