ADVERTISEMENT

This area is available for advertisement. Please contact for details.

Arnivang
Get Adobe Flash player

HURNAT AROI

BORSING R HANSE
Ko-an aningkan pen lone Hurnat aroi kili kecheng, majokta chinine. Bangso alangroi akung-kung, sokarbi atum rong rup sengsi, hurnat aroi Rupat kepat kachingbai. Komat aru si ok kejangnei lo? Aning arong kachepi. Halaso ahut ke, langroi parai, harai seta, karthatpik atukong ajo lang. Bangso alangroi akung kungsi, Den Terang, Den Timung, Den Teron lapu rong cheseng lo. British atumta vangvelang, Ahom atumta avelang, Man atumta kevangji chethan thelang an akai alam. Penang aningkan aphi, British atum nanglut tanglo. Kai chinine alongrisi nang kepla ajok, manghu mangram ta kedo rinti lo. Lasi, dak alongri kedo barim akhei atum alongsi dolo. Penang armu do Karbi atumta. Bangso angbong pen Den Terang helo kere lengleng. Alangliphan si, British akehoi Hutton sahap ta jirpo chibi paprang lo. Lahenlo- Den arong ke, khei barim arong binong lo. British atum vangve ako, Den Terang, Den Timung, Den Teron, Habe Kro, Habe Ronghang atum, tukong angnam arlo ok-hung kedam dam. Hideng kepat pat. Ha chirim langso apar, Nurak langso malom ok-hung kedam dam ahut, Hang-et long damtan lo. Bangso a Hang-et chophi si chethak krei lo. Hang-et a ok chodet pen, Habe Ronghang aphan Arnam lutchok. Seh kachelang avarsai chinine ong ahut, Hansepi pu inut a osopi Lodeppi akengri si, Banta-Bohot pen patardun lo. Arnam sopik mate, ingthirpik adimsi nangtum ok-hung kedam. Abi-avo kepathi pidam. Apotsi, nangman melobon pusi thanrong lo. Habe Ronghang akarjong ke sirkut ingdeng krehini arlosi dolo. Jonghele karjong hang seta long un-eh lo pukok lo.  Laso pen aphi, puthot Den arong amekar ahem along Chai pupu nangdomtan. Bangso achai aphan hile tokvok pen apbop si a ok chethak krei lo. Seta ik un vangve. Ke-ur seta pakreng un-e si, bitu kili ingvaipit anlo. Nini nithom aphi penke, Bitu kili ahur, monit monor kereng aphan anta bonthip titi lo. Bangso a bitu kili pen ajok rong-rup arlo, avur akrem nangthur tanglo. Komat ahemsi Chai a ok kele ma, hadak ke, bitu kili tangte bitu kili lo. Kerengji avarsai ave ongsi, ha inglong an chepachong damsi rong-rup sengdam thulo. Lahenlo Den arong atomo lo. Non Merok Kramsa Govt.ME School helo, Den Terang athiri lo pusi kachini atum kethan lema. Hurnat aroi akung kung nonputa tharve-jangphong do. Hako atum a Rongman lo. Ajatle chethan seta British atum alangli, Den Terang atum akerap pensi longri atok ano chini unlo. Inglong-arlok pangthek dam thek lo. Hutton Sahap akerap pensi Den Terang ta anong jume dolo. Pini arni anta, Den arong pu chethangplup lo. Son thakthak si Kuligaon Ingti arong seta British akai pen aronglo. Monit barim, Rong barimlo lahei arong helo. Non, akesar atum abang ave-etlo ajoksi ethan emum abang avedet lo. Ahok alam ke, lahai alam chinine te, elongri adui-ahoi chechini nelo. Phusar-phisar atum amen chechinine te, “aro” alam chechinine. Ronghang aso ma, chinthong aso ma, Amri asoma? Chechini ne. Lason lote, Khei ke kevir lo.  Ko-an aningkan alam lone? Hutton Sahap atum komantu tong nang kilut lone? Seta, “Hurnat Aroi” ason, roi ko-an lone alangroi do. Tukong-ingnam ajosi lijoi joi kedo. Monit monor nang kechan pen ke, akangthir aroi, akangthir arupat, akangthir alongchor anta, tantijai nangklang et. Lahei kephangnopi ajoksi monit monor atum heno-et bon!!! Seta, “HURNAT AROI” ta thep hakhe si li bom lang.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives