ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren pen Langhemphi kapacheleng NEC kaselam atovarpi kapatangji anatthu kapangno

A correspondent,
Dongkamukam, Thekar, Aru 19:
Havar kelangme kedoi et ajoine tovar le longku-longdang puseta lapen chingthu-charbu setame dam bor-i si penang a ningkan angbong ke rat atum Langhemphi pu ning kangsamdop ahavar humri dambom lo. Bonta nonke Langhemphi kedamji aphan NEC pen tovar kaselam kapatangji aphansi kachesik angthek thek long lo. Non amat NEC pen kaselam bangso atovar kapanai asai klembomsi prapjin kapatang detji aphansi rat atumta tovar cholang lo.
Langhemphi ahavar along rat atum kijuidam chethor varet ke jesemet ke ningkan arjon angbong ta kangsamdop abotor kedo lapen ahavar pen amat Thengjangthu karjapthip anparta bapso kelirsengver ajoine lo. Lason thakthaksi Ronghang Rongbong pen chenglok Karbi a Thong Nokbe asim-sap, Ha-i mu kapamo tekang a thengpi lapen ke-ongdung Karbi atum aphurkimo kachini damji aphanta rat atum humri dam bom lo. Anparta Umtasnieng alangsun, Biku alangsun, Langsun Thokphak, Thai Apser heihui alangsun kelang mesen ajpk rat atum aning kachepangsam damji aphansi tovar henopik seta dam lo.
Lason thakthaksi Langhemphi ahavar kelang mesen pu amen kachethang iklong ke jesemet ke ahavar pen amatsi kelirseng abapsi chechaphet lo lapen athe kangdursek athelu jonthi arongsi ahavar amat kedothip ajoine monit atum kijui dam ning chepangsam bom lo.
Pinpurme, Langhemphi ason ahavar along jongsi Karbi Anglong Autonomous Council pen kenangsot akachingthur asai klem asonte ahavar pini arni Karbi Anglong arlota kelang mesen lapen kedo mesen anparta isi kejuidam mesen adim do pu amen chethangklongji lapen Karbi Anglong Autonomous Council aphan medu ta mesen longji.
Non amat Karbi Anglong Autonomous Council pen keklem nangji ason ke Biku alangsun, Langsun thokphak lapen Thai Apser alangsun along kangni adim pen chenglok, mir abiri, dondon lapen kemesen atovar selam vek nangji lang. Lason thakthaksi kijui dam atum aphan mesen a kecho kijunji a kulat lapen ajo kesang aboha ta mesen kaselam nangji kenangsot lang. Lahai avarsai kavedet ajok ke-ongdung atum Langhemphi ahavar juidorde pinlang pusetame ajo kesang adim kave ajok tongsekok chevoi nangkok.
Langhemphi ahavar elongvet adim pen kachechar longthaiji aphan inglong aphuchong along kelangji adim kaselam nangji ta kennagsotlo.
Bangso ateng KAAC pen ahokpetsi sai klem pulotangte Langhemphi alom kedo riso-nimso lapen rat atum beha keklemji aphanta mesenji puta havar kedo kacheroktok arat atum chethan.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives