ADVERTISEMENT

This area is available for advertisement. Please contact for details.

Arnivang
Get Adobe Flash player

KAAC pen Bamboo & Cane Industry aphan kapangdang nangji akenangsot

A Correspondent,
Dongkamukam, Thekar, Aru 14:
Chek lapen Pree pen kaselamme ason dopik khangjang. Assam alongri along jasemet Karbi Anglong arlo keongdung a chek inghin lapen kaipho do. Labangso a chek pen non amat ke ke-ongdung ale kachepavangji aphan rat atum keklem asai jumhek asonsi thek long. Rat atum keklem chepadukchet pulote isi a hemtum kachepangreng phunji aphan kethedung avarsai do. Pirthe adang ta nonke chek lapen pree pen kaselam a hormu hortar penang kenam kachingbai do. Pudam lote Pirthe a hithi along kesoi keret pen kaselam a hormu hortarsi ke-ongdung arat atum kar-ih.
Bangso angbong Karbi Anglong arlo chek pen chenglok ason ason kesoi keret pen hormu hortar kaselam meji a thengpi thengphrang dopik khangjang. Laso ahut KAAC pen ardi bamboo & cane industry kangthurji aphan klem pulote pirthe a hithi mesen ahithi long dun akrong do lang. Jongsi Bamboo pen Cane Industry jongsi ingthurpon pulote ongdung voreng kave ariso-okorjang atum tame kachongdat adim longpo.
La anchot ta kalilang edon ahem akai arjon kachepangreng phunji aphanta jakong chelong un chenam.
Karbi Anglong arlo thangbakbe kesang prong a riso-nimso atum kedo bikbik atumsi keonglo thangbakma kacharli kangton pensi KAAC along voreng avarsai longjibon pusi chonghong prong bom lo. Bonta lake pini ove kimi atum kapadusi abidi kali atheke behaso keklem penta monit akai isi chelana bom atumsi ke-onglo.
Bangso behaso angbong ke kejoike pen Karbi Anglong arlo kelong ke a thengpi thengphrang pen pirthe a hithi along lan dun lote kethedung tangka ke longji avarsai dovek. Jesemet ke chek pen ason ason ahormu kaselam pen ajok kereng-iji avarsai mesen kechelongji a tovar do.
Lasi Karbi Anglong Autonomous Council kachari atum Karbi Anglong ariso nimso atum aphan mathasi Bamboo lapen Cane industry aputhak ardi kipipon nangji akenangsot do.
Pinpurme, Dongkamukam rongsopi along kedo inut a Aturson Teron ahin tame voreng avarsai aphan chonghong dingdesi amena a jakong pen chek pen ason ason a hormu kaselam charlisi pini arni anke alangli ri pen kaselam a, sofa set, tool, table, Bed, lapen ke ason ason ahormu Karbi Anglong lapen adung arei a district along anta chojor dun long lo.
Teron asangho pen kachethan atengke, alangli sai kapangcheng ahut cheklo ejon pen suri 10-20 an tangka chopangrum long, Bonta nonke alangli pen cheklo ejon along Sika 40,000-45,000 anbak tangka chopangrum long pusi pherangke aphan chethan.
Karbi Anglong arlo chek kelong joi ke mate adontin ahemta chek dorep asonsi thek long, seta laso achek pen ale chepado thekthe det asonsi thek long. Chek pen tooth pick, pen kechenglok dhoop lapen kaprek kaprek ahormu joike pen selam un seta selamlesi chek doseta amo pavangve det asonsi thek long.
Lasi methang along kedo ahormu pen ale kachepado thekji aphan Karbi Anglong Autonomous Council atum pen Skill Development aseke lapen tangka kerap tame pajir dun lote Karbi Anglong arlo voreng kave ariso okorjang atum aphai jum muchotji asonsi thek long.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives