ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong angkang kaprek kaprek adim temon kethe kejap, penang an hem kaheno

imageA Correspondent,
Dillai, Thekar, Aru 13:
Karbi Anglong a district angkang pini Aru 13 arnikangsam penang an adim along temon arve kethe ajok ongdung hem kaphalangno.
Pini arnikangsam porphai 5 apor malom temon arve kethe dut ajok Dillai lapen Hidipi ahavar penang an ahem, dukan lapen akaprek akhi adak kanahok dolo.
Hidipi ahavar along tovarpi a long thengpi ke krep ajoine minute 10 anbak kachehelat atum tora lo, aphi Desoi Kro arat atum rap dunsi tovar pacheleng thu long lo. Hidipi Bazaar Committee atum kikim kerang ahem humthom anbak hingno dun lo. Dillai lapen Hidipi ahavar temon kethe thengpi kekrep ajoine rihing ameh ari heihui anta kedak et ajoine ingtingsang asonsi dokok lo.
Lapu Singhason Constituency angkang Borjan pen chenglok Longnit ahavar alomta men-men temon kethe kejap ajok hem kirup lapen bari bithung along kacho-eh athengni amokha kekrep et ajoine thedung akhi adak kanahok do lo.
Lason thakthak Tarabasa, Phuloni ahavar ta temon arve kethe kejap ajoine bari along kacho-eh akove arong pen chenglok hem heihui kanahok ta dojai lo pusi birta rip dun long.
Pining aningkan angbong Karbi Anglong district hini along penang an temon kethe kejap pen hem rit kanahok dolo. Lahai atum aphan district administration pen kerap kapajir dam mate kelang dam pu abirta long dunde lang.
Aron ateng pulote lahai akisung kepho atum aphan District administration along kedo disaster management pen kisung kepho arat atum puthot hem kachikim thu thekji aphan kerap pajir dun nangji.
Lasi Karbi Anglong arlo ongdung hamphang asong atum lahai kisung keboi kepho rong arat atum apharman district administration atum pen chingki chethan pisi kerap kapalongji aphan klempi dun asonte mesenji pusi penang kacheroktok arat atum pherangke atum athengno ningje.
Pinpurme, pini arnikangsam porphai 5 apor malom Karbi Anglong arongsopi Diphu angkangta temon kethe kejap thek long seta hem kirup lapen khi dat kanahok abirta long dunde lang.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives