ADVERTISEMENT

This area is available for advertisement. Please contact for details.

Arnivang
Get Adobe Flash player

CEM aphan KNPEPC atum kachetong dam

Constituency hini pen suri 60 sose arat KNP kapangdang along sung dun nanglo: KNPEPC

imageStaff Reporter,
Diphu, Thekar, Aru 13:
Kaziranga National Park kedai Karbi Anglong Autonomous Council kaparlo hini a constituency Sochengdhenta pen Duarbagori arat atum Kaziranga National Park kapadang ajoine kisung alam kachethanji aphan pusi Karbi Anglong Autonomous Council aphan nang kachetong.
KNPEPC ajabang Mohen Bey lapen Benting Terang atum kejalin along Pitersong Rongphar pen chenglok kaprek kaprek ajabang atum pen pen vangsi CEM Tuliram Ronghang aphan chetong dam lo.
Laso ahut Karbi Anglong Autonomous Council a CEM Tuliram Ronghang aphan chetong damsi kisung kepho alam do-an chethan lo, laso kachethan ateng kachesong rappetji aphan CEM Tuliram Ronghang lamthe chipi dun pusi KNPEPC atum than.
Laso KAAC pen Special Leave Petition kachoningri aloh Supreme Court along kipi alam ta CEM pinpur dun puta alangli than.
La-an chot kali non alangli SC along PIL alamhoi kipi damji aphan chisik chedang bom lo puta KNPEPC ajabang atum than. Alangli tum pen Assam chief minister Sarbananda Sonowal aphan Kahora along chetong dun pen pinpur aloh kapajir dun lo, lapen laso ahut Eco Sensitive Zone kapaselam longle detji aphan nelita un-an nang cherap dunji pusi CM kachechak pu alamta KNPEPC ajabang atum pherangke atum athengno than.
Pinpurme, Kaziranga National Park Km 10 kapangdang ajoine Duarbagori constituency arlo suri 30 lapen Sochengdhenta constituency penta suri 30, constituency hini pen kado kave bang suri 60 arat atum non amat kisung angbongsi donang bom lo.
Bang suri 60 angbong phant 100 amatta Karbi atumsi KNP kapadang along akisung kepho pule pudet seta kaheno kali puta alangli tum ningje.
KNP kapadang mate Eco sensitive kapangdang ajoine Kaziranga National Park pen Km 10 angbong kedo havar arat atum sangti arlong kiphur longle lapen thengpi erong kithumpet longle, anparta hem kachokimji aphanta ajakong kave det ajoine thedung akisungsi chechak nang lo puta alangli tum pherangke atum athengno ningri.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives