ADVERTISEMENT

This area is available for advertisement. Please contact for details.

Arnivang
Get Adobe Flash player

Diphu kedongput Manja-Lumding atovar kapatangte det komatlo kapatangpo

Staff Reporter,
Diphu, Thekar, Aru 7:
Kedamtang 2011 aningkan pen kaselam kapangcheng Diphu kedongput Manja-Lumding atovar kapatangte det apot akomatlo kapatangji pusi rongsopi adang kedo arat atum charju rinti.
Simplex Company atum pen kaselam km 45 anbak National Highway atovar ketangte aphuthak Karbi Anglong arat mate hamphang asong atum kachesong kaningje kelak asonsi thek long.
Pinpurme, MP Biren Sing Ingti arideng pen inpusi bangso atovar kaselam pangcheng lo, seta pini arni anta laso atovar ketangte det ke Karbi Anglong aphan simplex company atum kelangplot binong angthek lo. Hamphang asong atum Simplex Company atum tovar kaselam kapatangterek apot dihu isi malom penang an ase angton chepathe rinti, seta non aphi ke ingsamri asonsi thek long.
Karbi Anglong arat atum kachesong ke-ot thipthe det ajoine maduta tovar patangvek nangji pu mathathe det asonsi thek long.
Laso ajoine kedamtang 2011 pen non 2019 achitim an damde aphita laso atovar tang un-eh det lo. Manja pen Diphu adak patang lo pusi kachekrong seta tovar kaselam ke-oi pik ajoine non tangdet ningkan kethom pli ansi dolang seta kevak ke-ongmunak ajoine gari kevek atum aphan kasiksak nang bat bom asonsi thek long.
La-an chot kali, Diphu-Manja adak Budhist Temple adeng malom ke langroi kedai anat kangrei et ajoine ajo phirlo kachehelat tame pherememe asonsi dolo. la-an chot kali Kheroni malom slat culvert kaselam tame kapatangte det ajokta penang an katora thek long.
Dak Diphu rongsopi angbong amatta Assam Oil Petrol Pump adeng pen ke kapatang kalilang, lason thak post office angdeng tame tovar kaselam ahut dong kithik ponpe det ajoine asapso arve kejang lote aphongtin lang kapabi pen kacheleng patora lo.
Laso thak Diphu pen Lumding kedam atovar along tame ladak Police reserve kisui PWD colony mate Bihu toli aber malom ta elong adim ke tovar kaselamle pajok tekangkok lo. Lason thakthak Assam University Diphu Campus adung malom penta tovar selam patangtesi bitekang kok lo. Laso thakthak kaselamtang ajo setame pharni arlong kethok nangji adim ephar ansi kapatang asai klemchot lang. kapatang kapadusi aphar ke mentu tong keklem pone lapen komat tong keklem pune maduta puthekthe det asonsi thek long.
Karbi Anglong Autonomous Council kachari atum pen chenglok MLA lapen MP atum tame laso atovar ketangte det aphuthak matha abang ave det asonsi thek long.
Hamphang asong atumta lason thakthaksi theklong.
Laso atovar kapatang pameme det ajoine non ketangtang adim anta kahenoloklo lapen ketangte lang adim ke akelesi kaheno asonsi theklong. Laso ateng pulote pining abarla kepar anke Simplex Company atum kaselam Diphu kedongput Manja-Lumding atovar kacheleng la-an sosesi katoraji angring kedo lo.
Pinpurme, monit kachingthur angthek ke, meh, lang lapen tovar kemesen hen lo kachingthur, seta Karbi Anglong arat atum along meh lapen lang abang mepik pu an ke kali seta dorchit ke dolo pu jong dam seta tovar kameme akisung pen abang nonputa kejokvan kalilang. Laso ajoine kachingthur pusetame ephar ansi chingthur dunchot asonsi thek long.
Karbi Anglong Autonomous Council atum kabor-i pik ajoine PMGSY scheme pen Karbi Anglong lapen West Karbi Anglong a District arlo atovar ano atovar penang kaselam theklonglo. Jongsi lahai atovar tang et pulote rong atok atovar ke mesensi dopo seta tovarpi amokha vakprotsi doko po. Athe Karbi Anglong arongsopi Diphu kekrongput highway simplex company atum patangtesi bikok lo. Lason thakthak West Karbi Anglong arongsopi kekrongput NEC atovar tame nonputa ketangji angring ave pin lang. Lasi lahai atovar ketangte ke Karbi Anglong district hini aratsi kechokche loma mate tovar kaselam a contract ke-en a company atumsi kechokche loma, ajat le chethan seta tovar tangtesi ingtongkok asonsi dokok lo. Lasi laso atovar komatsi patangji lapen komentunsi patangjima pusi ongdung kacheroktok arat atum than.

Leave a Reply

Your email address will not be published. Required fields are marked *

May 2019
M T W T F S S
« Apr   Jun »
 12345
6789101112
13141516171819
20212223242526
2728293031  
Archives