ADVERTISEMENT

This area is available for advertisement. Please contact for details.

Arnivang
Get Adobe Flash player

Robinson Timung aphan Khasi-Pnar bang kethom atum nopak pen katengkheng

APHLC pen West Karbi Anglong DC arideng pinpur aloh kapajir dam

Our Correspondent
Hamren, Thekar, Jangmi 29:
West Karbi Anglong district Hamren police Station kaparlo Tahpat Timung arong amekar Adwinson Timung pen Kati Ingtipi atum asopo Robinson Timung aphan kedamtang Bhomkuru arnikangsam porphai 6 apor malom Nongjirong along kedo Khasi-Pnar bang kethom atum chepengsi apran karmut detji aphan bor-isi nopak pen tengkheng lo. Laso ahut Robinson Timung aphan anung, achethot lapen ari heihui along nopak pen chorplinplin det anpin lo. Robinson Timung amethang apran kachepajokji aphan pusi jasemet ajakong chitisi amek kar-om ako kepho adim pen nang kat phitsi Khasi arong along chepachong dam lo lapen amek long nerkep kithu amek pen avi kili pik ajok hadak amat krep phitlo.
Tahpat arong arat birta longsi tongsekot Hamren Civil Hospital along an nang palesi kithi-kereng aphan kachedan bom Robinson Timung aphan seh lang dam lo.
Bangso alamki karju long pen APHLC ameiphu J.I Kathar lapen alangli risangho atum tongsekot pinpur aloh toksi WKA DC alar Additional Deputy Commissioner Md. Parvez Amin arideng pajir dam lo.
Karbi pen Khasi-Pnar angbong hotur kapave detji aphan Peace Committee  keseng dam dap prangji anparta areng keso abangphu aphan district administration atum pen tangka akerap kepi dunji aphan ADC Parvez Amin aphan J.I Kathar pachini tekang.
Hor kijun pen lok ke nopak pen thu setse, bonsita bangso asai langno keklem along komatne bidi langno kapinkhat abang do tahai, lasi administration lapen law & order atum ri-tarlip dam vek nangji pusi pachini tekang.
Robinson Timung asarbura pen lamthe kelong ateng ke, hidi kachelang dam ahutsi bangso kepho damlo’.
Hamren police station O.C Chiraj Ingti kethan atengke, kaheno keklem abangphu bang kethom atum aphan nep ingnangsi IPC aron ateng pen ingsaiji’.
Adai kedo bang kethom aphan prapjin kenep kangnang alongji aphan pusi VDP, rong asarthe lapen kado kave atumta nang cherap dun nangji puta alangli sodak pachini tekang.
Duma (Tobacco) kecho lapen kemong rappetji aphan hang lo, laso atengsi ne (Robinson Timung) damlo. Laso akedam ahut nopak pen katengkheng pusi areng kesovek abangphu chethan.
Nongjirong along kedo Khasi-Pnar bang kethom atum aphuthak FIR tokjirsi Robinson Timung ahem asor atum pen O.C arideng pilo. Laso ahut Tin Parpet, Chem Situng lapen Tram Tarliang atumsi katengkheng pusi jong dun lo. Laso ateng Hamren police station atum 29/04/2019 U/S 325/307/34 IPC bang kethom a ot kelangno Khasi Pnar atum aphan pabon lo. Non amat akoi kipi bang kethom a Khasi Pnar atum aphan nep longle lang.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives