ADVERTISEMENT

This area is available for advertisement. Please contact for details.

Arnivang
Get Adobe Flash player

West Karbi Anglong arlo kachepatujui kelangmeme adim dopik lang

Danielson Bey, Hidisajir:
Pirthe along monit kachilumpik ajoine malomso kejui kelang pen monsam mate ning arong kachipiji aphansi monit atum kaike ta rivung asonsi thek long. Laso ajoine anong kachethang kejui kelang adimsi kedamji aphan apor keme chori lo. India along Nainital, Mussourie, Darjeling, Sikkim, Dehradun, Shilong, Tawang pen kechenglok kaprek kaprek Hills Station along juidamsi ning arong chipi dam.
Laso kijui kelang aphan monit atum penang akhi chedam lapen akhi dam seta kijui adim aningkangsam ajoine ning chepa-oi eh. Kijui kelang atum tangka kapadampik ajoine haladak ahavar along kedo ongdung atum isi kerengji avarsai long dun. Kaprek kaprek ahormu kachojor kacholang pen chenglok tourist guide lapen anam pen gari kevek atum choki chokam ahin pen atovar long.
Lason ahut Karbi Anglong arlo kedo ke-ongdung atumta aningkan vangta kijui kelang aphan tangka chepadamsi angtan mate athak kejong adim heihui along damsi ning arong chipi dam. Seta West Karbi Anglong district inglong havar anatthu ta kachepatujoi kelangmeme ason dopik khangjang. Lasi lahai kado kave kachepatujoi kelangmesen adim ri pen pachingthur pen pachethang lote West Karbi Anglong tame isi kemesen hill station kemanji akrong thedung do.
West Karbi Anglong district inglong ahavar karlo ihin lapu Linchika arleng lapen ihin Tika arleng karlo pen lote aber thoi anat nang kachelang kelang lon kedo ining ingsamjin khangjang. Inglong kangtuiving ajoine lapu aber thui anatthu nang chelang lote pirthe kachechar kethepik ajoine kelang ining ingthai dang pen pirthe aningduk ning-oi tengne det anpin si kedo.
Inglong bakrak aphi West Karbi Anglong arongsopi Hamren ahithi tame ahok kachingthur jumhek lang seta kelang along dopik khangjang.
West Karbi Anglong arongsopi pen km 8 anbak kahelo Langmet pu ahavar tame kelang alon dopik haladak kedo arat atum kedo kethak ingsamjin lapen ingthir et, lason thot inglong aphuchong along kikim arong amokha tame ingthirjir. Inglong ahavar pinak apotsi sai katiki tame terrace cultivation si klem lo. Lasi setame isi kelang alon do-i pik, la-an chot kali inglong ahavar pusetame langso langmek kedo-oh ajoine lang kachithi longchor kili kachithing kijun aphan thangnat akaphere ave.
Lasonthotsi halapu Meghalaya ahoi kedai Amri, Chinthong, Khanduli lapen Zirikindeng ahavar tame kelangmeme ason dopik lang. Seta kachingthur jasemetpet kedam kevang avarsai kememe det ajoine lahai kelangmeme adim monit amek pen chepatujoi asonsi dolo.
Wanten pen kechenglok kaprek kaprek alangsun tame West Karbi Anglong a district angkang do seta non amat monit amek angdeng mate kachethang ke Koka picnic spot anparta isi hini ansi chethan chot. Laso ajoine adun arei a district lapen state atumsi laso adim along nangjui lapen nang lang chot.
West Karbi Anglong isi hill station pu voiphit tame ko-an ma kachethang nangji chethangthe det asonsi thek long. Lasi West Karbi Anglong district isi kelangmesen hill station pusi ko-an ma kachethang nangji chethangthe det ajoine havar along choki chokam anatthu tame chingthurthe det lo.
Laso ajoine havar along kedo ariso-okarjang atum kerengji aphan avarsai ing-arpir lo. Lasi West Karbi Anglong inglong ahavar aphan isi mesen hill station kapinchongji phan Karbi Anglong Autonomous Council a tourism asaikam along thedung arpu do. Tourism asaikam atum pen jongsi otthip pen klem pulote West Karbi Anglong isi kelangmesen Hill Station man un. Laso along Karbi Anglong Autonomous Council atum kacherap dun nangjita arpu thedung do, athe tovar kaselam pen kechenglok kaprek kaprek kachingthur asai keklemji aphan Tourism asaikam atum det ke un-eh.
Jongsi West Karbi Anglong a district aphan jongsi Assam angbong isi kemesen hill station paman thek pulote Karbi Anglong Autonomous Council aphanta thedung ale doji lapen West Karbi Anglong inglong ahavar arat atum aphanta thedung ale doji.
Methang ahem along kapaklang ahormu kachojor pen chenglok kaprek kaprek ahormu kachojor cholangji aphanta isi kemesen ahithi longpo. La-an chot kali tourist guide pen chenglok gari motor kevek atumta mesen tangka kevang avarsai dopo. Lasi West Karbi Anglong inglong ahavar along kedo kachepatujoi kelangmeme adim kedo-an pachingthur seraksi Assam angbong isi kelangmenai a hill station West Karbi Anglong inglong ahavar aphan pinchong nangpo.
La-an chot kali Meghalaya ahoi kedai West Karbi Anglong district jongsi pachingthur thekser pulote ahoi tame cheraikom thek po. Lasi Karbi Anglong Autonomous Council atum pen lahai aphuthak parsiksi prapjin pen keklem kenangsot lo, athe Karbi Anglong district hini arlo loh kethek voreng kave a okkarjang atum aphai inglumpik asonsi thek long.
Kechengsi Linchika arleng along alon kedojok Watch Tower selamsi tovar kedam kesang lapen Selfie Point isi selam lote kachethangji aphan isi akengkam chejor pangcheng longpo.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives