ADVERTISEMENT

This area is available for advertisement. Please contact for details.

Arnivang
Get Adobe Flash player

Polling Station No. 136 along puthot vote kejok, bang 688 angbong phant 70.78 vote kejok

Staff Reporter,
Diphu, Thekar, Jangmi 24:
Kedamtang Jangmi 18 arni 2nd phase vote kejok ahut eson-son ni akechokche kedokok ajoine 19-Diphu LA angkang Longki Timung arong along polling station No.136 Upper Dillaji LP school along pini puthot vote kejok thu. Laso ahut kado kave bang 688 a voter angbong pen bang 487 atum vote chejok dun thusi phant 70.78 pale lo.
Karbi Anglong arlo lapuson puthot kejok thu ke kedamtang arni Karbi Anglong arlo kethek long jumpik lang. Laso ajoine monit atum aphan isi akimi asonsi man lo. Seta kedamtang Jangmi 18 arni kejok pen apar pini puthot vote kejok thu arni vote kejok aphai jumdetsi thek long.
Pinpurme, kedamtang Jangmi 18 arni bang 688 a voter angbong bang 528 an atum vote joksi phant 76.75 an pale lo, seta pini puthot vote kejok thu arni bang 487 a voter atumsi vote jok lo. Kedamtang Jangmi 18 pen pini Jangmi 24 arni pangbar dam pulote bang 41 an jumdetsi thek long.
Todap porphai 7 pen vote kejok pangcheng lo. Laso ahut porphai 7 pen porphai 9 angbong phant 17.59 ansi jok lo. Laso aphi porphai 9 pen 11 angbong an phant 23.11 jok lo. Porphai 11 pen porphai 1 angbong arni keso pik ajok phant 13.52 atumsi vote jok lo. Arnitili porphai 1 pen porphai 3 apor an phant 9.74 lapen porphai 3 pen porphai 5 vote kejok kangton ahut an phant 6.83 atum jok lo.
Laso ateng kado kado kave pangrumpet phant 70.78 atum vote jok lo. Kado kave 487 vote kejok angbong pinsomar a voter bang 239 lapen arlosomar a voter bang 248 ansi vote kejok aphai long lo.
Voter atum Jangmi 18 arni vote jokdet pen kaprek-kaprek kachongdat adim along kachedam atum kedokok ajoine pini puthot vote kejokthu along nang chele dun un-eh det ajoksi vote kejok aphai jumdet lo pusi than.
Vote kejok along thangnat katora kavedetji aphan pusi Assistant Returning Officer Mukul Kathar, ACS pen chenglok ongdung ajakong kedo asaiphu atum vote kejok chelang dun. Lason thakthak ratchari asong ajabang atumta ongdung chetong dunsi chelang dun lo. Kado kave ahin langdam pame lote pini vote kejok ingsamjin pensi chun lo.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives