ADVERTISEMENT

This area is available for advertisement. Please contact for details.

Arnivang
Get Adobe Flash player

Strong room along tove malomso aphan hur kecho

Staff Reporter,
Diphu, Thekar, Jangmi 20:
Kedamtang Jangmi 18 arni No. 3 Autonomous District (ST) Parliamentary Constituency arlo lok sabha kilik vote jokdet aphi No. 18-Howraghat pen 19-Diphu LA apharman Diphu Government College si strong room pinchong lo. Laso ateng Jangmi 18 aningve pen EVM machine heihui strong room along bisi paton-palang lo. Lason ahut tove ajo porphai 8:30 malom strong room along kaprek-kaprek ratchari asong pen kachetoi dun kapaton-kapalang dun atum honthe meme ason thek longsi hur pacho lo.
Haladak kedo kaprek-kaprek ratchari asong pen kachetoi dun kelang chari dun abangphu atum kethan atengke porphai 9 aprang malom Karbi Anglong a Deputy Commissioner mate election returning officer damsi sinduk (Trunk) hini kepon thek dun long. Laso aphi minut 10-20 apharman CCTV ta inghap chek pusi than. Laso aphi APHLC pen kilik kachedan dun abangphu J.I Kathar (IAS Rtd) atum adim along pale dunsi haladak keton-kelang dun atum aningkangsamse ateng kado kave alam ahok kachini dakji aphan lang lo. Laso ateng CCTV pangpusi honthe meme asai kedo apor ahut an puthot kado kave athengno papaklang thu lo.
CCTV angton pen langthu lo. Laso ahut sinduk hini kepon ta thek longlo, seta laso a sinduk kaprek-kaprek ahormu kibi adim along kibisi thek long lo. Laso kethek long pen haladak kehon dun atum aning arlo kehonthe ason do-anta klardak lo.
Laso aphuthak deputy commissioner ta kecheng ahut than tekang lo, ahok lo sinduk hini pon seta kaprek-kaprek ahormu kibi a sinduk pusi than seta rat atum aning kephophe det ajoinesi kado kave lang thu pame lo.
Haladak kehon dun atum kapachini dun atengke CCTV rihing ameh kedam aphongtinsi kemep dun, la-an chot kali generator avarsai ta kememe det ajoine hadak kehon dun atum ningkangsamse chepaklang lo.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives