ADVERTISEMENT

This area is available for advertisement. Please contact for details.

Arnivang
Get Adobe Flash player

Kithi arnisi arni keme kehok

Koleswar Ingleng,
Evangelist, B.B.S
Monit atum kithi arni ke mekri-meklang lapen ning-oi ning-duk pensi plengset, labangso arni ke arni kahingno mate kopai kelangno arni pusi hokpo. Bonta Jisu Khristo kithi arni (Bhomta arni) ke "arni keme" mate kopai keme arni pusi hoklo. Pirthe adang amonit atum ta labangso arni ke “Good Friday” mate “Bhomta Keme” arni pusi hako penta talonbom vangbomlo.
Kopi athe si Jisu kithi arni ke “Bhomta Keme” arni pu hokrong lo?
Alamthe ke lapu henlo –
Arnam alam pen langdam lote monit atum kethenei akisung (problem) kedo-i atheke “Pap” henlo.
Tangte Pap puke kopi aphan lo?
Pap puke Arnam alam karjuje, kekroikre lapen kahingno akam ason an aphansi kipudam.
Monit atum aning kamatha hingnodak lapen keklem-kedam choklim kali:
Bible along Arnam alam lason si ethan lo, “Dhoromi abang inut ta ave lapen Arnam aphan kiri abang inut ta ave, kadokave amonit ta Arnam pen sui-et tanglo, halatum chokchepet lo. Halatum alangjoi ke kangpudang atipit ason thak-thak lo; halatum ade pen chobailo, lapen halatum angtur along ruiphe abi dolo; halatum angho ke kahingno ahirjuno pen plengsetlo. Halatum bang avi kapebu prap-o lo; halatum kedam aling monit atum aphan pavirlo lapen pesunglo. Halatum ning kangsam atovar chinine, lapen halatum Arnam aphan kaphere charlile.” ([Bible] Roman 3:10-18).
Lapen ining pen kamatha kahingno lapen emek pen kelang kahingno ason ta pap lo. Kado kave amonit ta pap klem tanglo lapen Arnam adak atur pen chingbarbedet tanglo. ([Bible] Roman 3:23; Mathew 5:28)
Kadokave amonit ta pap keklem et lo, lake koson lo ?
Bible along thanlo – Arnam kapinchongcheng amonit lake Adam lapen Eve. Alanglitum banghini Arnam alam arjujedet mate patepek detlo. Chori pu ason chodet ajoksi pirthe monit akhei along pap nangdokok lo, lapen anut-tin alongta pap do-et lo. ([Bible] Kecheng 3:1-8; Romans 5:12)
Lasi nonke monit atum jonghele kachepangthir asai ason-ason klem sita pap ke dokoklo. Akeme akam klem sita lapen lam keme le ningje sita pap ke dokoklo, atheke monit atum pap pensi mahang theklo. ([Bible] Lun 51:5)
Pap pen ajok kisung kepho lapen batai hini aphong kithinang:
Non akai monit atum ningkangsam ave, kaita phere nangju, kachebohong-charvo, ason-ason keso-kisung, ron-mai, mek-langno no-langno, kangri kangkarang, kanghon ave kangjinso ave lapen pran mui ke-en. Lasonsi labangso apirthe along ke plengset lo, lahai hai akisung kepho anchot ta kali kijutsi ke kithi kejang. Monit ke akarjong do, sita monit atum apap pen ajok akarjong ke Meherang (norokot) dam nangkok po. ([Bible] Kapeklang 21:8)
Kejok atovar: Monit atum apap pen ajok kisung kepho atum aphan kapejok ji, lapen karjong meherang pen kapejokji aphansi Jisu Kristo pirthe vanglo lapen thengparpan athak avi busi karkli lo, lapen thilo.
Arnam Jisu Khristo akarkli ke inut banghini, rong isi, khai isi aphan chot kali, lapen ephong -phongni, ningkan isi-hini, ove isi-hini aphan chot ta kali. Bonta akai apar akai athe ke sining pirthe ruretik akeso akisung pen kapejokji aphan si arkli detlo. A ove-ove pen kevang bon akisung – Lamki, aker, huni, nihu, chamburukso, ason-ason aron kepachok thekthe, karkli kiun-e, pachoi-pakin la an chot ta kali pap-pun do-an aphan kecham kepangthir ji aphan si arkli lo. Lapen ekarjong meherang (norokot) kangsai arni pen kepajokji aphan pen-pen si Jisu Khristo ephong vet akarkli pen patang det lo.
( [Bible] 1 Pitor 3:18)
Kithi pen kereng thu :
Jisu Khristo thi det aphi jothom-nithom kechok arni puthot kithi pen reng thulo. Lapen pirthe adang kejok abirta keme than tekangsi sining chedam lo.
Lasi Jisu kithi mate karkli pen ajoksi monit atum apap mate sonsuri akisung penta kejoklo. Lason kejok kelong apotsi Jisu Khristo kithi arni ke “Bhomta Keme” (Good Friday) pusi pachethanglo. Labangso a Good Friday mate Bhomta keme katalon ke 400 AD Jihudi akhai atum pensi pangchenglo. Lasi nonpu anta Jisu Khristo aphan kekroi atum anke labagso Bhomta keme arni talon bomlo.
Arnam ahirjume nanglitum along pedonang!

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives