ADVERTISEMENT

This area is available for advertisement. Please contact for details.

Arnivang
Get Adobe Flash player

No. 3 Autonomous district (ST) Parliamentary Constituency along phant 69.51 vote kejok

Assam angkang pho parliamentary constituency pen phant 73.32 an vote kejok

Staff Reporter,
Diphu, Thekar, Jangmi 17:
Lok Sabha kilik adunthu ave (2nd Phase) pini Jangmi 18 arni No. 3 Autonomous District (ST) Parliamentary Constituency pen chenglok kado kave parliamentary constituency pho along pini Assam arlo vote jok lo. Bangso ahut India angkangpi inghoi 95 adim vote jok lo.
Todap porphai 7 pen pangchengsi non arnikangsam porphai 5 an Autonomous District (ST) Parliamentary constituency angkang inglong a district kethom Karbi Anglong, West Karbi Anglong lapen Dima Hasao along vote jok lo. Laso ahut kado kave pangrumpet phant 69.51 an vote jok lo.
Pinpurme, 19 Diphu LA angkang todap apor ajahak polling station along EVM machine kaheno pu ajok vote kejok apor ateng pen pangcheng longle det lo. Laso ajoine vote kejok dun arat atum aphan thedung kasiksak dolo, seta ongdung arat atum methang aning kedok abangphu mate ratchari asong aphan pahaivek nangji pu mathasi arni keso lapen arve kejeng mathathepin vote kejok phant 69.51 an jok lo.
3 Autonomous District ST Parliamentary Constituency angkang todap porphai pen non arnikangsam porphai 5 an vote kejok ahut nahok a polling station mate nahok ahavar along penta soluk-sodak abirta ave ingsamjin pen vote kejok patang lo.
Diphu angkang Basic Training, Panbari, Upper Hapjan, Rongkimi LP School polling pen chenglok kaprek-kaprek polling station along pini EVM machine ka operate katikuk ajok ajok asapso vote kejok long der chet lo, seta presiding, polling officer lapen kaprek-kaprek kacherap dun atum keklem kemesen ajoine apor ateng pensi vote kejok patang lo.
Kedamtang vote kejok a phant pen lang dam pulote non aphong lok sabha kilik ahut vote kejok aphai jumchet.
Laso aphuthak ajahak a polling station along adeng ketang a presideng lapen polling officer atum kethan atengke non aphong voter list along photo kedokok ajok bang a vote kejok kachonghu kijumpik (Proxy) apotsi vote kejok aphai kijum thek long lo, seta non aphong ke kejok anta ahokpet a abangphu atumsi vote kachejok lo. Lason ahut ajahak kacheroktok abangphu atum kethan ke, non aphong lok sabha kilik ahut kaprek-kaprek alam keklang ajoine rat atum manghu-mangram kedo ajoinesi ajahak atum ke vote kejok dunde pusi ningje.
Diphu LA angkang model polling station puta selam lo. Laso ateng Diphu Town Primary LP School alongta Model Polling Station pusi jong lo. Model Polling Station along vote kejok dun atum aphan kenangji avarsai an kipi etji aphan pusi kaprek-kaprek avarsai ta thik pilo.
Pinpurme, 19-Diphu LAC, 18 Howraghat LAC, 20 Baithalangso, 17 Bokajan lapen Halflong LAC, kado kave LA pangrumpet 3 Autonomous District (ST) Parliamentary Constituency along kado bang 7,95,084 a voter angbong phant 69.51 atumsi 1174 a polling station along vote jok lo. Tekok tiki a voter bang 1610 angbong pen ongdung atum vote kejokji aphan vangve puta birta long dun. Latum aphan joike pen vote kapajok longji aphan district administration lapen social welfare asaikam atum chelangsi wheel chair thik pilo, la-an chot kali tekok-tiki a voter atum aphan kachejeng (Que) kaparjap dun jokplotji aphan anta varsai pilo, seta ongdung atum vangve det lo.
Non aphong lok sabha kilik ahut vote kejokji atum polling station pen Mtr 100 arlo anke mobile phone pen chenglok kaprek-kaprek electronic ahormu palut longle pu seta pini a polling station tin alongta laso ron kroikre detsi kethek long.
3 Autonomous District ST Parliamentary Constituency arlo kado kave 1174 a polling Station angbong 113 a polling station aphan pherememe (Sensitive) pusi pangthek lapen polling Station 98 aphan ke katengkheng heihui doji meme (Hyper Sensitive) a polling station pusi pangtini lo, seta lahai along ta pini thangnat akisung avepinso rat atum amethang methang a vote aning kehang abangphu mate ratchari asong aphan chipi dun longlo.
Dimasa National Liberation Army (DNLA) atum kangkir kepha ajoine hithi angkang ingkir kling ajoine vote kejok atum aphan asapso katora dolo. Laso ajoine ta inut bang hini atum ke vote chejok dun longle det lo.
Non aphong lok sabha kilik ahut LAC pho along voter aphai ke Halflong LA along bang 1,37,317 a voter angbong phant 58, Howraghat LA along bang 1,26,727 voter angbong phant 69, Diphu LA along bang 1,89,454 voter angbong phant 69.5 lapen Bokajan LA along 1,41,159 a voter angbong pen phant 72.25 ansi vote jok lo lapen Baithalangso LA along 2,00,427 a voter angbong phant 71 an vote jok lo.
Pinpurme, lason ahut Karimganj parliamentary constituency along kado kave 1721 polling station along kado kave bang 13,38,005 voter angbong pen phant 71.41 atum vote lo. Silchar Parliamentary constituency along kado kave polling station 1461 along bang 1191289 angbong phant 71.79 jok lo.
Mangoldoi Parliamentary Constituency along kado kave polling station 2353 along bang 1795529 angbong phant 75.07 vote jok lo. Nagaon Parliamentary Constituency along kado kave polling station 2283 along bang 1790684 angbong phant 75.71 an vote jok lo. Assam angkang MP inghoi pho apharman kilik along kado kave polling station 8992 along bang 6910592 a voter angbong pen phant 73.32 vote jok lo.
Pinpurthume pini Diphu LA angkang vote kejok aphai kijumhek ajoine ajahak polling station along ke arnikangsam porphai 3 aphi ke vote kejok a polling station along ingthai dang thek long.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives