ADVERTISEMENT

This area is available for advertisement. Please contact for details.

Arnivang
Get Adobe Flash player

Dolamara along Congress kilik kapachethang amai

Raton Ingti kejalin bang 700 BJP atum Congress along kachingbe dun

imageA Correspondent,
Diphu, Thekar, Jangmi 12:
Duar Bagori Congress Committee atum patirpisi Dolamara along kilik kapachethang amai pangni.
Mai kapangcheng ahut Nilip Block Mondal Congress Committee ameiphu Rajen Ingti jalinsi arnam ardom lo. Laso ahut India ke isi secular adet, lasi kado kave atum amethang aning kehang ateng ardom ardi long pu angtheksi chepaklang lo.
DMCC ameiphu Rensing Teron kachepahemphu amai along sankur chunbang Wesley Langne kedeng alamthe, mai alamthe lapen alohi kapachini apor en lo. Mai along alohi sarpo aman pen MP kilik kachedan dunji abangphu Birensing Ingti chetong dun. Mai along Surjya Rongphar, Suren Singnar, Semson Ingti, Kasang Terangpi atum pen chenglok ongdung man kedo song ajabang atum chetong dun.
Atumi BJP pen kache-oh MAC barim Raton Ingti, DTC chairman barim Daniel Ingti atum pen kechenglok ongdung BJP che-oh pen Congress along kachingbe dun atum aphan mai along deng lo. Lasonsi HSDC jabang Tarjen Terang ta Congress along kachelang dun aning kehang alam chepaklang, la-an chot kali HSDC ajabang Khorsing Singnar ta mai along BJP atum CAB lapen UCC kilik manifesto along kepon anparta kapachunji pu ke-otthip aphuthak mai along pachini. ASDC atum BJP pen kachemesen anparata kachipuke regional party, seta BJP atum asaisi keklem pusi alangli ASDC atum aphan jong.
Amethang arat aphan isi asong along pen akaprek asong along kepon nangvoi aphuthak MAC barim Raton Ingti ningduk chepaklang. Congress along kidun pensi Karbi Anglong aphan Bangladeshi pen raikom thekchotpo pusi alangli mai along jai.
MP kilik kachedan dunji abangphu Birensing Ingti kejai ke, ne Karbi Anglong arat apharman un-an chesong pidunji lapen ajat akisungle do tame arjap pi dunji’.
Tuliram Ronghang kejalin Karbi Anglong Autonomous Council atum Dolamara along Km 3 atovar Dolamara Forest Range pen arlong kekoi akor an tovar kaselam chot apot pinrem. Laso atovar kaselam ke Marwari atum arlong kaparoi kapajoi dun aphan chot puta alangli jong.
Mai along APCC chunbang Semson Sing Ingti ta amethang alun pen mai along kachetong dun arat atum aphan aning parong lo.
Mai along MAC barim Raton Ingti, DTC chairman barim Daniel Ingti lapen Lokhimon Sangha ameiphu barim Joysing Ingti atum jalinsi don 700 BJP arat atum Congress along chingbe dun.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives