ADVERTISEMENT

This area is available for advertisement. Please contact for details.

Arnivang
Get Adobe Flash player

BJP aphan kaparemvekji pu akemang pen CPI(ML), HSDC atum Biren Sing Ingti aphan vote jokpo

imageStaff Reporter,
Diphu, Thekar, Jangmi 12:
Delhi, Dispur lapen Diphu pen Haflong anta BJP nang cherai det aphi detpi adang along thekjam-rejam nangmanlo lapen ansose nang keberthip nang do lo. Modi kachari BJP atum pen Democracy, Salajong ajakong lapen rat aphan ajakong aron aphuthak penang-an teng kheng lo. Det arlo khei-khei hijan pacharvosi phere meme angthek rat atum angbong ning isi pet hako pen kachingri apot thak phun-phun lo. ihin ke kedo-an rat apharman ajakong pavirsi, kethe nai-nai corporate mate company aphansi klem pirong.
Det arlo inglong aso, dalit, adivasi atum alongle-phelang, inglong ahavar aphuthak kedotang ajakong kethiji aronsi klem rong. Kedamtang aningkan 45 angbong pini kethenai choki-chokam akisung nang bat piklo. Tangka kelar amen pen Lakh-Lakh kachongdat atum avarsai pave det lo. Arnivang kenangsot ahormu-hortar ador pabat lo. Pini loh charli okkarjang, sai katiki kachongdak atum, inglong aso, Adivasi so-arlo, aphai kijumhek adhorom atum inglong aso kethek-kere arat atum aphan anta Constitution ateng Democracy lapen Secularism mate Fundamental right tengkheng lo.
BJP ratchari ahin pen non abatai “Songkolpo Patra” along kapangdak atengke, BJP jongsi puthot jakong chevangthu lote puthot khei-khei angbong kapacharvoji aphansi “Citizenship Amendment Bill” abangke pachunvekpo, Ram Mandir kekimji aphuthak lapen Kashmir along kedo Art. 370 abangke pavirdet po. Lahai henlo RSS/BJP atum “Hindu Rastra” kapamanji akemang lo. Seta det arlo rat atum kenangsot-sot akisung pen kapajokji aron thangnatta ladak long le. Ihin pen ke det arlo Fascist ajakong kachari longverji aphan isi khei-khei angbong pacharvosai lo.
Alangli tum kapaklang a manifesto along Karbi Anglong lapen Dima Hasao ahavar apharman constitution along kedo tang Art. 244(A) kipijji aphan chinilor seta chingrai plot lo. Lason thotsi Assam ahavar arlo khei throk atum aphan ST ajak dingklui pen nang kachesong aphuthakta panung thiplo. BJP kachari ratpangri atum arnivangta inglong aso atum aphan keraikkomji kalisi mate ejahak ajakong kekhamkhe akamsi klem rong. Ihin anat thuke Karbi Anging lapen Dima Hasao arlo kedodun Bodo akhei aphan plan Tribal pen Hills Tribe kapamanji aphuthak khei-khei angbong pachethak lapen pacharvo asai nang deng lilo.
Ilitum 1947 aphi det arlo kaphere meme nai Fascist ajakong aphan nang kachetong nang ke chekobir vek nangpo. Lasi non aphong akilik isi kachedan nang aphuthak matha parsiksi CPI(ML)/HSDC pen isi akethenai akangsai deng nangkoklo. BJP rat atum aphan akethenai political ideology ahotur ason cheplang lo. BJP aphan kaparem vekji aphan CPI(ML)/HSDC pen Common Candidate aphan un-an bor-i lo, seta chun un-eh det lo. Lasi CPI(ML) Hills Party Committee lapen Hills State Demand Council atum BJP aphan kaparem vekji apharmansi Cong(I) pen kachetoi dun abangphu Biren sing Ingti aphan vote kipiji aphansi rat aphan choningri.
BJP aphan kekroikre atum an vote kachethak jamje detji aphansi 3-(ST) Diphu Lok Sabha constituency along kachepate dunde ta pini deng nangkok lo. Karbi Anglong lapen Dima Hasao arat kedo-an aphan nelitum ahin pen choningri lo, Hako phusar-phisar ahut pen kedo kethak kemesen asonthotsi Karbi Anglong lapen Dima Hasao arlo chotiki-chongdat, lo kacharli ariso-ejang, so-arlo atum aphan keraikom pameji lapen aron ateng Art. 244(A) kachesong aprang keponji apharman BJP aphan paremvek lonang.
Bangso along CPI(M-L) Liberation election amanifesto ta pangdak thu. CPI(ML) kilik Manifesto kejong 24 Strengthen Federelism, Federal Restructuring and Re-orgnization of State pu along Karbi Anglong lapen Dima Hasao atum apharman Constituency along kedo Article 244(A) kapachunji aphanta jongdak lo puta pini District Press of Karbi Anglong along pherangke amai kangni ahut CPI(ML) Liberation Hill Party Committee a chunbang Rabi Kumar Phangcho pangdak.
Pherangke amai along KNCA sankur chunbang Pratima Inghipi, HSDC tiri amei a ameiphu Selawor Bey, chunbang Laichan Ingleng atum pen chenglok kaprek kaprek man kedo atum chetong dun.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives