ADVERTISEMENT

This area is available for advertisement. Please contact for details.

Arnivang
Get Adobe Flash player

Birsingki along BJP vote kachohang amai

Congress, AGP pangrumpet kado kave bang 427 atum BJP along kachingbe dun

A Correspondent,
Dongkamukam, Thekar, Jangmi 12:
Ke-ongdung a vote chepalong pen BJP atum kevangji MP bangphu kangvai mesen pen kachepahaiji pu akemang pen pini Amri pen Chinthong Constituency apharman Birsingki along BJP vote kachohang amai kangni. 
Mai along KAAC a CEM Tuliram Ronghang alohi sarpo aman pen chetong dun. Amri constituency a MAC D.Uphing Maslai, Chinthong a MAC mate EM Prodip Rongpi, MLA Dr. Mansing Rongpi lapen West Karbi Anglong District arlo ongdung BJP a songja atum chetong dun.
Kevangji arni prapjin pen tovar kedo-an PMGSY a scheme pen selam etpo pusi D. Uphing Maslai chechaksi Horen Sing Bey apharman vote hangpi.
KAAC EM Prodip Rongpi kejai ke, ‘Article 244(A) aphuthak ke Horen sing Bey si parliament along ningje dun thip haiji, lasi ongdung a vote pisi Horen Sing Bey aphan pahai nangpo’.
Vote kehang amai along hini a constituency arlo kedo Congress lapen songve arat bang 427 atum BJP along chingbe dun.
Mai along alohi sarpo aman pen kachetong dun CEM Tuliram Ronghang kejai ke, Team Karbi Anglong pen ke-ongdung a kachingthur asai keklemji aphuthak rat aphan pachini. Team Karbi Anglong kemang asai lapen Karbi Anglong pen Dima Hasao arat arjidingklui pen kemang article 244(A) pachunvekji pulote Horen sing Bey aphan kapahai nangji kenangsot lo puta KAAC CEM Tuliram Ronghang ajai.
Halapu BJP pen kaparjap dun Horen sing Bey ta MoU, MOS lapenke article 244(A) kapachun pameji aphan rat atum jakong nangpidun pulote un-an kachesong dunji aphan chechak. Lasi neli haladak Parliament along rat akemang article 244(A), MoU lapen MoS aphuthak kaningje dun longji aphan rat atum nang cheto dun nangji, nanglitum nang kacheto dun ke ador keso a vote BJP aphan kipi hen lo.
Ratchari asong along chejok dunde aprang penta alangli Bey asangho ke khei lapen longri ajoine kachesong a phurkimo ta mai along chethan. Lasi lahai kado kave kachingthur amo rat aphan kipithekji aphan ke alangliphan ke-ongdung a vote pen pahai nangpo pusi alangli choningri.

Leave a Reply

Your email address will not be published. Required fields are marked *

April 2019
M T W T F S S
« Mar   May »
1234567
891011121314
15161718192021
22232425262728
2930  
Archives