ADVERTISEMENT

This area is available for advertisement. Please contact for details.

Arnivang
Get Adobe Flash player

Rat aphan palusi BJP ason-son kachechak, eson ta paplengple: Raton Ingti

Diphu Town Committee a chairman barim Daniel Ingti ta song pen kache-o

Staff Reporter
DIPHU, Thekar, Jangmi 11:
Pini KAAC EM barim Raton Ingti amethang ahem along pherangke amai kangni ahut kapangdak ke, kedamtang 2014 aningkan BJP pen ason-ason akemang kechak along rat aphan palusi eson ta paplengple. Lasi ning kachethe move ajoksi sai jokje pen che-o nangkok lo pusi alangli ningje.
Narendra Modi kejalin pen det lapen nihang nirep anparta Karbi Anglong pen West Karbi Anglong akelar thedung kevan doji pu ning chethesi kedamtang 2015 aningkan Pre achiko niphai 12 arni BJP along chingbe dun lo pusi kache-o aloh along pangdak. Laso ratchari asong aphan neli ning kachethe ateng kali det lo. Kachingthur lapen kapaprang akichun aphuthak kehang sarlang along isi ta angthek ave det puke thekprong lo, la-an chot ta kali ajahak atum karvo pen song angbong kethak. BJP jabang kehoi, song kapangtangvek atum aphan arlo-arlo pen keber aphuthak neli ning hanghe. Lasonsi tangka kelar lapen GST abidi kedeng pen song ajakong kebop kecheng lo. India ajutang adhorom kangcho along kapabop asai keklem, lapen lapu an det kachingri along ta kethak, ningduk meme, alongtin a institution ta jakong nang kebop lo. Lasonsi CBI, NIA, financial institution lapen judiciary anta pajokje. Nujok pli ajakong kethe along katengkheng, ninghang aling ajat ta ningje long puta ajakong pabopsi ningje longle, Taliban bidilangno asonsi keklem.
Song pen sai chotiki arat aphan kapasung, ke-ongdung abidi keplang atum aphan langvong lapen kidun atum aphan kelang kapangkre; ratchari ale chepalongji aphansi kiduk atum aphan arjan chepaklang chot pen thangta ave lo. Million-million India arat aphan joi-joi pen bidilangno keklem. India pu adim asitin a textbook along Hindu Rastra pu kelar. RSS pen BJP atum khei-khei kapacharvo meme asai kedeng along chechak un-eh puta KAAC EM barim Ingti kache-oh aloh along pachetak.
BJP asong pen thangta kemesen asai theklongle. 21st century akai ahut India ingtangkring adet kapaman dunji along me atur ason kar bor anvet lo. Song pen kaphere meme CAB kedengji ajoine Assam akhei barim lapen nihang-nirep ahavar do-an chesongsi par-om lo.
Joi-joi pen song angbong BJP East pen West Karbi Anglong kejalin Raton Teron pen Arun Terang atum aphan koirok ason keklem puta KAAC EM Ingti pherangke amai along ningje.
India adangpi 100 rongsopi along Smart City, 21st century akai ahut kuti hini okkarjang (Youth) atum aphan voreng kapaplengji alamchak kachepaplengple, la-an chot kali Karbi Anglong voreng kave ariso-ejang ke-ongdung atum aphan kipi thekthe; kidukvok atum a account along lakh 15 atangka kethapji pu alamchak inut a account alongta le damde puke kado kave ta chinihur lo. Black money do-an pachevan lapji pu kachechak chepapleng, Jammu pen Kashmir along Article 317 ta pachokche, Lok Pal Bill ta padengde, India atangka aminu kapangchoji kalisi aphi ong pachelut ong; uniform civil code heihui BJP ratchari asong pen kedeng heihui along ning kangsam dunde ajoksi song pen chepahelo dun lo puta EM barim Ingti ningje. Lasi Karbi Anglong amonit atum matha dam  pamesi chekirla nangpo puta alangli choningri.
ASDC pen kachetoi dun Holiram Terang lapen BJP apharman kaparjap dun Horen Sing Bey atum aphan vote chepalongji aphan Article 244 (A) kapangdak kaningje nangji aron ave athema autonomous state nangne pusi ASDC atum MoU chetok lo lapen Horen Sing Bey ta MoS kachetok dun abang lo. Indira Gandhi kachari ahutsi 244 (A) aron pathik tekang lo. Lasi laso aron kaselam ta Congress atumsi keklem puta alangli ningje.
Non amat madu ratchari asong penta nang kachopha ave lapen jongsi mane ratchari asong nang kehang pulote matha det po. Lasi non amat kaprek ratchari asong along kidun alam ave puta alangli chepaklar. Penap Jangmi 12 arni Dolamara along Congress kilik apong-ut kibut ahut jongsi nanghang pulote kidunji aphan matha det po puta EM barim Raton Ingti ningje.
Pini Raton Ingti pherangke amai kangni ahut Diphu Town Committee chairman barim Daniel Ingti ta BJP asong pen che-o dun. Lasonsi Joising Ingti ta BJP pen che-o dun lo.

Leave a Reply

Your email address will not be published. Required fields are marked *

April 2019
M T W T F S S
« Mar    
1234567
891011121314
15161718192021
22232425262728
2930  
Archives