ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi alamthe kimi thip-o nangjilang

Karbi ke khei kangthim lapen alam ta ingcho pik
    pulo seta hako ahut Karbi alam ko an ma kechan
    ateng pen non kai kimi an ke nang kacheprek thepik lo. Hako-ko akai pen non akai kimi angbong science kachingthur pen ko an lone hormu kimi nang keklang. Lasonsi asontin lapen ahintin anathu ta scholars atum research keklem bom ajok monit aphan kerap akemesen-sen akimi ahormu heihui ason-ason paklang bom lo. Lasonsi amen ta irdun bom lo. Seta Karbi atum aphurkimo along hako penta kave-kadure ason nangdo-o lapen kethekdun longle ason ta nangdo-o. Laso apotsi Karbi alam pen ke hako ahut kave lapen kethek longle ason aphan an ke amen ir dun thekthe det, non akimi keklang aphan amen ki ir dun ke aphi bikok lo. Lahai alam aphuthak jongsi langdam pame pulote jongdam meme (Example) ke train, gari heihui, lasonsi tarin a driver, gari a driver, aeroplane a pilot aphan amen ir dun thekthe. Laso aphi ke arleng kethe pulote CM, EM MLA, Minister, Mauzadar heihui aphansi chini chot seta officer, bureaucrat lapen ke kachoklem amo ta carpentry, potter, mason, handicraft, doctor, lawyer heihui aphan ke hako pen ta Karbi atum angbong kave lapen kethek longle ajok amen irdun thekthe det mate kachinine ajok amen ir dun longle lang. Lason thotsi ili Karbi atum angbong hako pen ta grammar pu kopi ahormu ma ta chini-o eh. Neli kipudamji ke Karbi atum hako pen ta grammar pu chinine pin puke pu un eh athe po-pai, asopo-asopi lapen akur aphi arloso pulote pi pu ketokdun. Isi alam kelang dam nangji ke kecho, kijun lapen kemong. Lasonsi damji, damjilang, damjilang bon, dam lo mene, dampo bon, dam lo meme, dam meme lo khangjang, damvek lo. Lasi neli kipudamji ke grammar pu kachinidak mate kevaidak kave ajok non ili ove kimi atumsi Karbi a grammar ke thik nang po. Ili kaike kachoboche akai along kaningje alam an ke grammar pule langdamde seta pachok lim kekenglep pen Karbi alam kaningje lapen kaprek akhei alam pajudunde pin kaningje abang ke akenangsot khangjang. Ili methang alam kaningje ahut jongsi pachok lim pen paleng pen jongsi kaningje aphan bor-i eh pulote methang alam ke pachan un eh lo. Lasi methang alam pachok et pen kaningje thekji aphan bang alam pen kedo tang abarim ason an chot ta kali si non akimi keklang lapen a term amokha anta methang alam pen ki irdun et thekji aphan matha pame pen lamthe thip dun lap nangji. Laso kithip along ta lapu matha pen amat dojoi ke chokche. Dak nelitum Thekar ke kaike pen ta lasonsi rivung ver, lasi Thekar a chapbang aphan chetong ra akimi alamthe kapachethangji aphan la kithip alamthe kimi amokha pi nangpo. Lason jongsi anuttin ta klem lapen rin dun et pulote Karbi alam kangchoche detji alam amatsi ave.
    Non Thekar pen kedamtang apor an ke lamthe kimi thip pik lo lapen ketok pen pachethang pen kapachanji aphan bor-i olo. Laso kapachan along Karbi sankur arat atum ta kedamtang lamthe kimi kithip along an ke nangcherap-cheto dun lo. Lasonthotsi non kevangjilang arni anta lapu an sose nang kachepadunji aphan netum ke kaike ta tovar cholang.

Leave a Reply

Your email address will not be published. Required fields are marked *

April 2019
M T W T F S S
« Mar    
1234567
891011121314
15161718192021
22232425262728
2930  
Archives