ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong longri ratchari kerengji aphan akisung nang do tang lo

Ratchari asong angbong National pen Regional
    (Longri ratchari) angbong kacheprek ihin pen ke
    akeme ihin pen ke akaheno. Longri ratchari ke methang amonit atum si angsong arpu ajakong ke-ot athe songja lapen songjapo atum anta longri amonit atum saideji, lasi dak methang kenangsot atengsi sai ta klemji, bonta National asong pulote lake bang Delhi pen aning kehang atengji. Lasi lason along ke methang arat ateng puke longri pen jongsi ingtangrak asongja ave pulote dak ili ning kehang ateng ke akasiksak doji. Seta state arlo song akisung ahut abang ke kachirip athai dothu, bonta longri ratchari ke nahok ta athai ave lo.
    Karbi atum longri ratchari mate longri ratchari asong (Regional political party) kopi lapen koson ma puke 1985 aningkan AGP Asom aratchari nang kacherai lapen 1989 aningkan ASDC atum KADC nang kacherai pen an ke longri ratchari aphuthak chini lo. Karbi Anglong arat pu chot kali non ke Asom angkang arat amatta non 2011 kilik pen ke longri aratchari ke kijut lo ma lahai pu monit atum matha meme. Athe longri ratchari asong atum ke atai pu ason amat majok pen ta kisung ahut akerap kelongji aphan ning kachethe ave. Seta national political parties atum ke jongsi isi bak a state along le remrui puseta mo apor ahut ke hala akaprek amethang asong hijan kachari asong atum halaso a state pen akerap nangpi dun det titi. Bonta longri ratchari asong atum (Regional political parties) ke amethang ale ave pulote nahok mate akaprek a state pen akerap kelongji aphan aning kachethe ave mate vangve. Lasi non dak Asom angkangpi lapen Karbi Anglong arlo ta akisung thetanji. Asom angkangpi ta longri aratchari asong AGP atum ningkan sose akerem ajok song kerengji aphan akasiksak thetan po. Non la kilik angthek nangklangdet aphi anta song angbong kachetonte alam ke keklang do lapen songja lapen klembang atum keklem kachepaduk pen kerem ta kapar eh prat ajok aning kirun song kache-oji aphan kamatha atum ta do-o lo. Lasonsi Karbi Anglong atum ta ke-ongdung song klembang atum kachoklem athai kave ajok kaningje alam penang an keklang do. Non lasi mo kevangji aphan ning kethe ke state govt. kachelarji ta central along govt. chelar tetik lapen Karbi Anglong kachelarji ta mo state govt. chelar tetik. Lata dak longri ratchari asongja atum chepangtang nangji lang. Longri ratchari jongsi pangtangthu jilang pulote monit mate rat aning kehang ateng isi thirklong aratchari pi thek nangji. Rat aphan koson pensi kapakroiji ke rat ateng nangji. Aprang-prang ahut ason ra kachongthui ke kejoike kali lo. Lasonsi mesen a issue deng nangkok po seta 244(A) aphuthak lam tang lo. Akethenai ke Karbi Anglong Regional Politics along ke ASDC pen CPI (ML) angbong pacheton pen klem rap abang dovek nangji lapen non kedamtang MLA kilik ahut ason netum a candidate ave pu ajok vote kejokje ke la an sose si ingduk-i rong po. Laso aphi ke symbol ta aprang arjan oso chihing a symbol che-en thek nang vek nangji. La-an pen akethenai ke CPI (ML) pen Dr. Jayanta Rongpi pen Holiram Terang aphan ta ASDC along chevanthusi latum abang rat angno ari che-ot chom pen arjap thipsi ASDC pen CPI (ML) angbong dorapre seta seat sharing pu abang chekroi thekvek nangpo. La-an lo pulote rat ke puthot aning rung pen chevang tahai seta angsong Asom lapen Central aratchari atemon ta asap nangjap nangji. La-an pen akethenai ke song asongja angbong kachetonte alam aprang ASDC kangtang chit ahut ason dipthip un nangji.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives