ADVERTISEMENT

This area is available for advertisement. Please contact for details.

Arnivang
Get Adobe Flash player

Hemprek amen pen ratchari kapathu kangtonsi keme

Karbi akhei anuttin ta hemprek nangne, ning hanghe puke ningje abang ave lapen lapuson ke aning ta matha vangve. Anuttin a Karbi ta hemprek ke aning hang pame lapen hemprek ke nangji pusi kamatha rinti. Bangso ajok Karbi ahamphang ke hemprek hen lo aning kehang kethenai lo. Laso alam asitin ratchari asong, jasemetpet pen hemprek kehang amen en lor pen ratchari asong kacheseng atum rat aphan hemprek amen pen vote chohang ibom lo lapen chepahai ibom lo. Lasi rat aphan hemprek amen en eh ra kachingthur alam abang le en asonte mesenji athe asitin asong ta non kedamtang apor anke alam chot saide lang. Lasonsi hala keklem abang ta hemprek amen pen chongthuithe ra kachingthur amo keklemsi kemeji athe non kedamtang apor anke kethek long majok ratchari asong ta aning aklong pen hemprek kehang puke thek longle. Hemprek amen en lor pen ratchari asong kacheseng atum ta rat angnosi hemprek kehang chot, seta hala kenangsot adim ke pale damde. Lason alam ke tarlip ra a record along langdam pulote chini po. Seta hemprek kehang kachepaduk ke rat anglum kedam lapen meeting along kehang kataram anchot lo. Lapusonsi state lapen national ratchari asong atum ta rat anglumsi hemprek hang chot lo, lata kilik apor ahut chot lapen hang lo pu kachepaklangji aphan ajahak asai klem lo. Athe Congress atum ta amethang government dotik ahut ke ingsamri lapen hemprek kehang puta amen chot asonsi kethek long. Athe latum Delhi along ningkan kep lapen Assam along ta chardun ron ningkan krepho chari lo, tangte laso ahut kopisi doklip lo? Rat aphan kachepaklangji pura ahut pen ahut memorandum pi damlok titi chot. Lason keklem ke madu ta chini lo plengple puke, seta lapusonsi klem rinti amat rat anglum ke chepindak ichot. Athe lapuson ahemprek kehang ke ne methang amat ta dun pen chini dun bom lo. Lapusonsi hala BJP atum ta lamchak pi lo lapen lapusi padam bom lo. Lasonsi hala hemprek kehang amen ke en lor pen ratchari asong kacheseng ASDC, HSDC heihui atum aphan ta thek long bom lo lapen Council ta ningkan kre isi chari lo lapen MLA ta ningkan ingkoi ta chari dunsi minister anta deng lo. Hemprek kipi ajakong kedo parliament along anta MP batai kethom haisi hemprek kipi apor ahut anta dodun lo. Tangte latum aphan ta ko ansi rat ke apor pi nangji lang? Hemprek kehang chun chunche ke aphi lo seta nirling pen a level-level kachingki keklemdam non amat kethek dam long ke KLNLF, JACAS lapen KANCHASDCOM atum anvet lo. Latum ke Delhi dam pen un an pen keklem damji aphan ke bor-i bom lo lapen kachingki ta do lo. Ahut isi ASDC ta ahokpet pen klem lo, seta 1995 aningkan MoU chetokdet aphi ke amen chot asonsi kedamtang apor anta thek dun long bom. Athe hemprek kehang pu press statement ke pibom seta Delhi along official level keklemdam puke thek longle. Lasi non kilik ahut hemprek hang chotche ra kaike ta hemprek kehang abangsi klem nangji lapen rat anglum hemprek amen ke en eh det abangsi kemeji. Ha konatne lang kave, tovar kave, seh kachelang avarsai kave heihui abangsi ardi pi nangji. Hemprek ke lapusi chepindakde pin pen hang bom nang po.
Lasonsi BJP ta ladak Diphu pen ha Delhi anta jakong kaparisim ningkan pho dam etlo, seta klemkle. Latum ta jakong kave ahutsi hemprek hang thu lilo lapen lamchak nangpi lipo, seta ha 2014 aningkan Rajnath Singh lapen Nitin Gadkari atum kachechak alam ke lamdak lo. Lasi hemprek alam penke rat aphan chongthui nangnelo.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives