ADVERTISEMENT

This area is available for advertisement. Please contact for details.

Arnivang
Get Adobe Flash player

Non akai lapen English alam

Pirthe adang kapaphrang (advanced/developed) alam do-o. Bangso angbong English alam ta isilo. Pirthe adang lam ajat kedo-an angbong Chinese alam henlo kaningje armu ke-ong pusi pangthek ponlo, seta chinese alam ke China adet anparke akaprek kaprek adet heihui along kaningje mate bangso alam asai kapado atum jum-o. English alam kaningje atum aphai chinese alam kaningje armu aphai aphan jumchet pusita bangso alam kaningje lapen asai kepado armu pen adet ongpik. English alam ke amethang api alam ason asai kepado adet ke United Kingdom, United States of America, Australia amonit atum anvet pusitame bangso alam arnivang bepar-beha, Sorkar asai kapichun, School, College pen University heihui along kethan kapachini (Mediun) anta pirthe adang English alamsi asai kapado ke-ong. Non akai ke Science akai (Scientific age) pulote technology alam nanglerok. Non akai ke technology aphan pu-an kacho-akha nang mate kachiki nang (Dependency) technology alam kethekthe mate kachinine atum ke arnivang kedo-kithak mate kereng dun anta kisung dokok lo. kitun-kedang, katiki-kanghoi, loh-bida kacharli, bepar-beha asai heihui along anta technology asai pado ponvek nangkok. Technology anat-thu (advanced in technology) ajoine nonke pirthe ta chetebok hetlo. Pirthe adang pen erongvet ason, lasi nonke Global Village puta kipulonglo,bepar-beha , kachedam-kachevang, birta-chala kachipi anta joipik. Aphrang-phrang isi abirta erui, achiklo ke-en adim nonke meksirip anvet. Bangso technology ahin nangkangdang ajok English alamta aphrang apar nangingdang lapen nangchanthu parpik lo, lasi non akai ke aphrang-phrang pen English alam aphan ardi (importance) kipipe adet pulonang-China,Japan,Russia pen akaprek kaprek adet anta english alam kacharli chehungbomlo. Athema lahai adet ajalin atum pirthe adang chokam amo (Economics) ingtang nangji lapen paphrang nangji pulote English alam kethek kenangsot. Non hetjong report along kepaklang atengke pirthe adang bepar-beha  (Trade&Commerce) along phant 80 (80%) ke English alamsi asai kapado lapen Technology  pen akimi abida mate kethekmi- kelongmi (Invention & discovery) anta English alam pen saide. Lasi non akai apirthe ke lohthek puseta English alam thekthe-chinine te choklim (complete) kalidet ason. British atum nangkachari ajirkiding ajok India adet ke aphrang penta sorkar asai ihin-ihin birta chala kachepale bepar-beha, School, College pen University heihui along anta English alamsi asai kepado, sadhin longdet aphi penang an alongri adim-Ganga athoipi (Gangatic plain) angkang Hindi alam kapatheji aphan English alam kapavirji aphan kabor-i tirlap lo, sonsi Assam arlo assamese atum Bengal adet Bengali atum penang akhei mate alongri adim methang alam kachepathe longji aphan English alam kepavirji aphan kabor-i tirlap. Bonta English alam kevirji kali lahai alongri alongta English a school heihui kangpu mate kichan kimu kevang asonbenlo. Pirthe adang akaprek kaprek adet asonsi India adet alongri tin alongta English alam aphan ardi kipi chehungpiklo bangso atomon non Assam alongri ta nangkele penang an aningkan penlo. Bangso atomon Karbi atum angbong nangkejap ajir dingpiklo bonta akaprek a inglong alongri along ason Sorkar pen English Medium kapacharli avarsai kithek ponpedet ajok asai jokje pen asomar-mar aphan Assamese Medium a school along chetoidun nangkok. Kedamtang anke kethe kiding ,keplang-kiphi asomar atum ansi ador keso English a school chetoi dun unchot, non amat English a school pulote Missionary lapen private a schooll anvet. Lahai a school along osomar atum amen kachethap dunji aphan kacheto lapen osomar aphai ongpik-pik, lake Karbi atum Assamese aphante English a school kacharli aninghang mate chihungmu  pu angthek. Ketheklor angthek ke Diphu rongsopi along henlo. Diphu Govt High School along Karbi a osomar aphai jumpik, bonta DAV English medium a school along anam kipi jokplot ajok osomar ke-ong kangni adim chetangtedet lo. Lason ahut Diphu Govt Boys High School along English medium avarsai kechengpon ke kemepik asailo. Bangso avarsai illitum cho-en dunthek nangpo, kapathirji aphan rat lapen songja atumta cherap-cheto dun nangpo, lake rat kar-i alamlo.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives