ADVERTISEMENT

This area is available for advertisement. Please contact for details.

Arnivang
Get Adobe Flash player

Birta aloh kaporhi armu aphai penta isi akhei kichum-kehar angthek chini-un

Isi akhei ko-an paphrang dun loma lapen paphi
    langma angthek kachiniji aphan isi hini kapangrup-
    i abarlon asai pado nangji. Isi akhei kichum-kehar alam kachinji aphan kapangrupji abarlon ke bangso akhei phan ko-an amonit atumsi kecholong-kijun pen keplang-kiphi atum kedo helo. Ko-an armu aphan atumsi thirklong ahem kikim-un, achiklo ajontin lapen ningkan isi si angbong tangka maha ko-an si kelong heihui helo. Pudamdet lote, isi akhei angbong, kecholong-kijun long pen keplang-kiphi atum aphai jongsi ongdung lote bangso akhei aphan chokhi-chokhan (Economic) amo chingthurlo pusi pudam po. Bonta loh-bida amo jongsi paphi dunhup lote majok akhei tame chokhi-chokhan (Economic) amo chingthur dun un-e detji. Lasi akhei tin ta economic pen akaprek-kaprek amo kachingthurji dunji aphan loh-bida kethek paprang ke akenangsot. Isi akhei ko-an aprang anat kengkam chejordun-un lo, kichun bom loma mate kehar pon bom loma ke bangso akhei loh-bida anathu ko-an kapaprang dun ma aphuthaklo. Puthot bangso akhei loh-bida ahin ko-an ma kachingthur angthek kelongji aphan birta aloh kaporhi atum aphai penta ilitum chini-un. Pangbar damme, pirthe adang isi kapaprang nai adet ke Japan henlo. Japanese atum loh-bida kethek aphai ingtui pik apotsi economic, political pen akaprek-kaprek amo ta chingthur nangkok. Japan adet amonit atum ko-an loh-bida kethek atum ke-ong ma ke Japanese alam abirta loh heihui kaporhi atum aphai pensi klang daklo. Japan adet armu aphai million 127 sose chot anat. Bonta Yeomuri Shimbum lapen Akashishimbum pu arnivang keklang abirta aloh kaporhi atum amonit aphai Million 30 sose. Bonta Hindi alam kaningje armu aphai Million 600 sose bonta isi nat a Hindi abirta aloh ta million isi kaporhi armu aphai ave. Athema Hindi alam kaningje akhei alongri (Hindi Belt) helo loh-bida kethekthe aphai ke-ong nai lo pusi paklang lo. Loh-bida anat thu kapaphi pik apotsi India angbong lahai longri along amonit aphai ke-ongdung atum ke kiduk ongmunak lo, lapen detpi along rat kachingthur amo kangdai nai (Lowest human development index) lo pusi paklanglo. Seta ilitum adet amat Kerala alongri alam chethan dam lote ko-an keprek ilitum thek longpo. Kerala alongri armu aphai million 20 sose chot sido bonta Cochin arongsopi pen kapaklang Malayalee alam Malayala Monorama pu abirta aloh kaporhi atum aphai million isi ando. Ladak kamanghu dam nangji thang alam ave. India angbong loh kethek atum aphan Kerala helo kangtui nai. Haladak lo kethek atum aphan 80 athak. Loh kethek atum ongdung apotsi India angbong isi ketheknai akhei lapen kachingthur alongri cheplanglo. La-apotsi birta  aloh kaporhi atum ta dopik. Ili pen tebok het Mizi lapen Khasi atum pu thak-thak. La hini tribal akhei atum loh kethek aphai ongdung ajok alangtum alam pen kapaklang abirta aloh heihui kaporhi atum aphai ongdung. Lake lahai akhei kapaprang bom pu angthek lo. Non lahai akhei atum pen armu aphai chingbarchit Karbi alam pen kapaklang abirta aloh heihui kaporhi atum aphai jumpik. Lake ilitum akhei kapaphihup-o lang pu angthek lo. Lasi isi akhei ko-an kapaphi-kapaprang kachiniji aphan birta loh kaporhi armu aphai ke-ong ke ong-e penta chinidam-un.

One Response to Birta aloh kaporhi armu aphai penta isi akhei kichum-kehar angthek chini-un

  • Non ke Digital India amat news paper ka porhi k rong k late information si long rongpo athe networking akai mathe advance akai binak local news lipu Facebook instagram,tweeters, Whatapp etc nationals pen international newshunt,Google news etc

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives