ADVERTISEMENT

This area is available for advertisement. Please contact for details.

Arnivang
Get Adobe Flash player

BJP pen kachetoi dun Horensing Bey apharman Ram Madhav vote nangkehangpi

Diphu along BJP atum kilik kapachethang amai

Staff Reporter
Diphu, Vosik 5:
Non kevangji Lok Sabha kilik ahut Diphu LS Constituency along BJP aphan pahai pulote Karbi Anglong chingthurdunpo. Tangka kevang (Direct funding) pen chenglok ajat kachingthur asai keklem aphanta joike po.
Det along sixth schedule autonomous council kedo an angbong Karbi Anglong ban nai lo lapen bangso autonomous council kapachingthurji aphan Parliament along bill ponlo. Karbi Anglong kapachingthurji aphan direct funding tiri ratpangri (Government) pen council aphan nanglopo pusi BJP pen kithur dun MP candidate Horensing Bey apharman kilik kapachethang amai along BJP tiri chunbang Ram Madhav jai.
Karbi Anglong arlo kaprek-kaprek akhei atum do, lasonsi Bengali, Adivasi, Bihari heihui lasi laso alongri aphan ke mini Assam pudam un. Kedamtang Congress MP kedo ahut Karbi Anglong aphan thangta klemkle, seta Sarbananda Sonowal pen Tuliram Ronghang kachari kabor-i ajoine non ke chingthur pik lo. Ladak MP ke Congress seta, PM Modi ke kachingthur avarsai nangpi. Langdam pulote Assam arongsopi Guwahati aphanta Diphu arongsopisi kachingthur ahin paprang detpo.
Birensing Ingti aphan aphong-aphong Karbi Anglong pen Dima Hasao arat kachetoidunlo, seta inglong arat aphan tangnat asai ta klem pithekthe. Ladak ta BJP aratpangri, state ta BJP, Delhi ta BJP lote kachingthur ke plengset po puta jai.
Nanglitum kehang ratchari ajakong aphan kehang ke PM Modi pen Sonowal si pachunpo. Kedamtang arui Tuliram Ronghang keja KAAC abitung atum state dihin a minister Dr. Himanta Biswa Sharma Delhi arongsopi along chetongdamlo. Kachetongdam abitung atum aphan ajat akehang seta pachunpo pusi PM Modi chechak dunlo. Ingkrung ingchap pame pensi PM Modi nanglitum akemang kapachunji aphan klempo puta mai along Ram Madhav jai.
Karbi Anglong ke India adet along kechengsi autonomous council lo. Lasi kachingthur aphan non akai akachingthur aphan klempo. Birensing Ingti ke sartanglo, bonta kesar abangphu aphan neli man-pengpi, seta non ke alangli sartanglo apot kevangji MP kilik ahut ke BJP pen kachetoidun non a ove abangphu Horensing Bey aphansi pahai nangpo. Northeast alongke Congress asong avedetlo lapen nahokta Congress ke avelo. Kilik nangkele ahut Assam along methang pen charjap haihesi non ke AIUDF pensi kilik chedan rappet po tangho. Bahruddin ke kijut po athe anghoi 11 Congress aphan pi po pu pangdak etlo. AIUDF anghoi 3 ta lang kilutpo pu pini kilik kapachethang amai along tiri BJP chunbang Ram Madhav jai.
CEM Tuliram Ronghang kejai ke, ‘BJP pen kithur dun Horensing Bey aphan vote jok pen pahaivek nangji atheke BJP atum Karbi Anglong pen Dima Hasao apharman autonomous state lapen non KAAC aphan tangka nangkapale kapabat lapen kaprek-kaprek kachingthur aphan lo puta CEM Tuliram Ronghang jai.
Mai along EM barim Kuntila Ronghangpi asopo Rukasen Ingleng pen danglok bang 1300 sose atum Congress klembangphu bangphi atum tiri ratpangri BJP chunbang Ram Madhav dengsi BJP asong along chingbedun.
Mai along Assam MoS Piyush Hajarika, Ramen Deka, Bokajan LA MLA Numol Momin, KAAC chairman Longki Timung, deputy chairman Ritesh Inghi, EM Jagat sing Ingti pen Amorsing Tisso atum pen danglok KAAC EM, MAC, MLA barim Bidyasing Ingleng lapen kaprek-kaprek asongja atum chetongdun.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives