ADVERTISEMENT

This area is available for advertisement. Please contact for details.

Arnivang
Get Adobe Flash player

Khei kerengverji aphan kacheharjak

Jongjung akai seta adim aklong lapen kavoreng dun
longji aphan kacheharjak akenangsot. Kacheharjak  (assertion) puke kachepaklang, kachepachini aphansi kipudam. Khei apharman kacheharjak pulote kachesong aphansi kipu damthu. Khei apharman kacheharjak thek mate kapherere akhei atumsi pini arni pirthe adang ingtangchot, paphrangchot lapen adim-aklong chelong dunchot. Kacheharjak dun thekthe mate kacheharjak kaphere akhei atum nangvir bomlo athema kacheharjak thekthe, kaphere ajok kelongji ason anta kelong thuji kali kelongtang ason anta chepavir bom. Khei ingdukvok ajoksi kacheharjak ajakong kave. Kacheharjak ajakong ave lote khei ahotur atum illitum aphan joike pen eber undet. Kapaphi akhei lahai hotur atum nang keklem abidi pen asai emek angdenle nangklem seta chini dunde, lang dunphrong. Lasonsi mo kachechini anke ajakong avi padampo amat thang ta klem un-edetpo. Karbi akhei momo anta rengverji pu non amat kipu dam sungkrung binonglo. Illitum alongri angtan aso aphai nang kebat non pherememe anpinlo. Bonta illitum kacheharjak dun thekthe ajok illitum alongle-phelang angtan aso nang cherai bomlo. Longle-phelang ta bang akhei arideng kele si nang ongbom lapen armu ta bang atum nang chanbon ajoine moke ajat asonta bang akhei atumsi nang parichopo. Illitum ke bang atum akengpak arum do nangpo. Cheharjak thek tangsi lake netum alongle, netum arong puta cherai dun thekji, ese chibi dun thekji. Bangso amo ta Karbi atum cheharjak dun thekthe. Kacheharjak ajakong kave apot kelong nangji aron dokok Autonomous State ta non anta long thekthe. Kangtangrak akhei atum kacheharjak ajakong kedokok ajoine constitution along ketok lapen kelong nangji arondo pu ketok ave seta kemang ason an chun longbom. Illitum ke kacheharjak ajakong kave ongke bang atum ephere dordedet apot kelongtang an ason , ajakong ta bang angtan pen nang pachiphu dun long bomlo. Bang atum angtan pen nang kachiphu, nangkachejok dun emek theklor anta kekhamkhe dunji mate kacheharjak dunji ejakong avedet ason. Constitution mate aron ateng pen nangpu dun longle lapen nangchiphu dun longle seta pini arni kaprek kaprek abidi atovar pen illitum alongri, rat ang-i pen kapelong a political ajakong anta bang arideng chipi thu-et asonsi theklonglo. Lasi khei kaparengji aphan khei kemang ason kapaplengji aphan lapen kelongtang ason-political ajakong, longle-phelang, elam-elun kaparengverji pen kapathir verji aphan illitum cheharjak seletledei mate phere redet nangji. Lake netum alongri, netum si ahemphu man nangji, netum alongri netum alamsi ingdang nangji, netum adim chokam avarsai anta netumsi kelong ong nangji cheharjak thek nangji. Khei apharman pulote angdi isi eseh chepado dun thek nangji anlote bang atum ladak nang kedo kevang ephan ephere po lapen aning kehang aling klem longlelo. Akaprek alongri amonit atum sakori, contract, longle-phelang pen kaprek kaprek avarsai amethang atum arideng kachibi longji aphan kacheharjak abirta illitum kaita arju longverlo. Lasonsi illitum jokta lake netum alongri, ajat asonta netum ahemphu, netumsi long nangji pu aning dora  cheharjak dun thekthe mate matha krang pulote emethang ahem arlo amatsi illitum ke ajat asonta phodundedetpo. Non lasonsi nangman bomlo pu abangke kaningjeje, kanengriri abang ke avelo. Bonta thurpak, angdi isi pen chesong mate cheharjak thekthedet apot illitum arideng pen kedo-an asonta dambomlo. Lasi kacheharjak pulote rat atum pen chenglok kachari ajakong kelong (rulling) pen opposirtion asongja atum anta cheharjak dunthek nangji. Cheharjak dun pame thek lote bang atum nang kilut, nang kachiphu dunji atovar long thekthedetpo lapen haihe detpo.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives