ADVERTISEMENT

This area is available for advertisement. Please contact for details.

Arnivang
Get Adobe Flash player

Vodilangso pen Umru aphan kapanong PMGSY atovar Vodilangso arat longle det

Our Correspondent
Hamren, Thekar, There 18:
Harlonglangdo, Biriklongtar, Langmet, Rongkor kaparlo ongdung rong kachokim havar arat atum Vothatlangso (Baithalangso) arnivang biri-bithung pen kelong kove, bikron, chek kaipho, arphek pen kechenglok han kachojor dun arlosomar atum arong arleng karleng deng ajok kedam-kevang kisung kaningri aphuthak rong arat pen aphong-aphong job card pen klem kacheleng kejoikeji aphan tovar cheselam bom lo.
Laso akisung kachepejok un-e ajok havar pli arat atum KAAC kachari EM Rupsing aphan choningri lo. Laso ateng PMGSY a saideng (scheme) kedengji aphan lamchak chipi lo. Lamchak ateng Hamren pen Vodilangso an vangsi puthot Vodilangso arat pen kechenglok penang arat atum chetong dunsi Vodilangso pen Umru an akeng pen dam rapsi prapjin PMGSY a saideng tovar kaselamji lamchak pithu lo.
PMGSY along-e kesom along No. 20 Baithalangso (ST) LAC MLA Dr. Mansing Rongpi Socheng MAC lapen KAAC EM Rupsing Teron angno kedamtang aningkan Phaikuni 19, 2018 arni long-e som lo.
Halaso along-e kesom pen non Vodilangso anatthu PMGSY atovar nang kihutji kalisi Umru komcheng pen ha Longre kacheleng atovarsi bangso atovar kihut thek long pusi ajahak atum akoi kipi. Labangso atovar jongsi Umru angkang pen Longre kapachelengji aphan chot pulote Vodilangso pen Umru an akeng pen kedam havar arat aphan chechakche det nangji apot puta anghor kardik pen arnivang chojor cholang beha-bepar keklem, school loh kacharli osomar kedam-kevang kasiksak kepho atum pasimu lo.
Vodilangso pen Borpu NEC atovar kachepho ajak kaselam ponpe anta kalilang non Vodilangso-Umru PMGSY atovar kihut Vodilangso arat aphan langplot, Vodilangso-Umru atovar Umru angkang pen Longre kachelang atovar kehut det ke momo phurkimo tame tengne un-e puta havar arat pen ning duk alamthe chepaklang.
Havar arat pen Vodilangso atovar PMGSY pen kihut thuvekji aphan KAAC kachari CEM Tuliram Ronghang anparta Socheng Constituency a MAC EM Rupsing Teron aphan havar pli arat choningri.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives