ADVERTISEMENT

This area is available for advertisement. Please contact for details.

Arnivang
Get Adobe Flash player

MCC aphuthak Commissioner pacheroktokji aphan sankur arat apharman cVigil a App kangpu: ECI

Kevangji kilik kapachunji aphan ECI pen saiphu, police lapen expenditure observer angbong arni kangthim kachingvai

PIB
DELHI, There 14:
Kevangji Lok Sabha lapen havar pli along Legislative Assembly kilik ahut kosonsi kisik kedangjima pusi pini Election Commission of India patirpisi kilik kapathik ahavar along Observer atum aphan kethan pajirmi ajaimek deng lo. Bang 1800 IAS, IPS asaiphu kehoi atum chetong dun anparta Indian Revenue Service lapen akaprek Central Services atum chetong dun. Lahai asaiphu atum aphan General, Police lapen Expenditure Observer toi lo.
Observer atum keklem nangji arpu thepik, Chief Election Commissioner Sunil Arora kejong ke, saiphu atum asai kacheklem angthik jot nangji lapen kechokche asai abang cheklangkle det nangpo. Sunil Arora kachematha dam alam kaningje ke, non hetjong state kilik kapathik ahut phant nang kacheklang jumpik an, lasi pulonang EVM-VVPAT along aloh nang kacheklang kosonsi nang phant nang jum varet lo lapen ajahak atum electoral roll along amen nang kacheklang dunde, kalite vote kalakha kapader, lasi lahai kechokche cheklangkle detji aphan kemesen asai klem nangji. Kedamtang 1950 aningkan penlo kilik asai ahut methang asai kacheklem dode sangse lo, lasi non adihu ta kilik asai mesen kapachunji aphan alangli choningri. Kilik asai kedeng along Observer atum methang asai kacheklem bom ahut katora kachetong pen kangsai dun kichun along CEC ardi chipi nangji, methang asai keklem angthikjot kali ma kalangma ta ECI pen lahai asaiphu atum pinkhat lo. Sunil Arora kejong thuke, apor dam bom lo, tangka ajakong kapathe along pangthek dun nangji lapen social media along kapachethang along akimi kachedan lo. Alangli kaningje thuke, kejokvan lapen ahokpet kilik kapachun aphan ECI sungkrung bonta chekhinde, chechar dak lapen ahokpet kilik aphansi klem nangji.
ECI pen keklem kedam nangji aron kapathik akido lapen keklem un pu aloh along Observer lang pame pen klem un pu pachun thek nangji pusi Election Commissioner Ashok Lavasa choningri alam jai. Lavasa kapinpur alam kaningje ke, Model Code of Conduct aron karkan along kechokche along kapangthek dunji aphan sankur arat mek chibi dun lorsi Commissioner aphan pacheroktokji aphan pen cVigil App ingpu lo. Bonta laso a App pen saiphu atum arpu kacheklem nangji thetan lapen electoral system kelang dunji ta arpu thetan. Kado kave ahamphang lapen kethek kere atum aphan than pachinisi lasi asai kedengji aphan kilik asaiphu aphan pu thu lethot lo.
Saiphu aphan kipu alam Election Commissioner Sushil Chandra kaningje ke, kado kave kilik asaiphu atum ta Observers ahin asai kacheklem nangji arpu thetan lapen mek chibi dun lor nangji lapen ajat asai ta Commission aphan pachini phit nangji la-an si kejokvan pen ahokpet kilik lo pu cheman unji. Lasonsi Expenditure Observers atumta kelang kapangthek dunji nangji arpu thetan athema voter atum ajahak ason kachinine asonta paklar dun thek po.
Arnikangthim kachingvai lapen kachethan chepare amai along Deputy Election Commissioner kehoi, DEC lapen ECI a DGs pen ko-ansi kilik kisik kedang ahut kaprek kaprek asai pen cheraplok asai kedam alamta saiphu atum aphan than paklar. Kilik kapachun akemang, Observer atum kacheklem nangji asai arpu, electoral roll aphuthak, Model of Conduct aron kapangdang, legal provision, EVM/VVPAT kisik kedang, pherangke pen kacheraplok lapen Commission pen sai kedeng SVEEP (Systematic Voter’s Education and Electoral Participation) heihui alam than pajirmi lo. Voter atum avarsai kejoikeji aphan Commission pen kengkam kachejor IT asai Observers atum chinisi than dun thek nangji lapen kilik asai kedeng ahut keklem kedam nangji aron chini pame nangpo. Observer atum aphan kosonsi EVM lapen VVPAT ke-ot nangji than pachini nangpo anparta EVM raikom thip nangji athema kechokche cheklangkle det nangpo.
National Election Planner lapen Compendium of Instruction aphuthak Election Expenditure Monitoring pen kelang chari dunji arpu observer atum an aphan pek lo, lasi laso ateng pen cheklem nangpo puta Commission pachini.
ECI pen kechengsi aphong lo akimi mobile app ki-ir ke ‘Observer App’ henlo. Laso a App kirim pen General, Police lapen Expenditure observers atum jokvan pen Observer’s report amokha ECI aphan pachini un seta keplenglim aloh ta laso mobile app along thap dun nangji. Observers atum kenangsot amokha a notifications, cheroktok lapen kenangsot a messages laso App pen methang asai kacheklem bom ahut chini po. Kapale damji nangji alam observer atum laso a statu chini longpo, ID card download nangpo lapen methang a profile update nangpo. cVigil Model Code lapen kapadam aron karkan heihui ta observer atum chini dun long po, avaikang kithik cVigil pen kacheraplok asai an laso App pen akerap long po. Flying squad pen laso aphuthak katarlip along Observers pen tok dun plir me lo.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives