ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren Civil Hospital along kethekser seh kelang thek a doctor nang toi nangji

imageOur Correspondent,
Hamren, Thekar, There 13:
Assam ratpangri kachari anparta CEM Tuliram Ronghang kejalin Council kachari atum pen West Karbi Anglong district inglong arat aphan mathasi Hamren Civil Hospital along prapjin seh kelang thekser a doctor amokha nangtoi nangji pusi rat atum kehang.
Hamren Civil Hospital along child specialist lapen gynaecology a doctor kave det ajoine osomar akeso lapen oso kachopathe bom a sarpimar atum penang an katora do lo. Hamren Civil Hospital dokok aphita osomar aphan kelang lapen oso kachepathe bom arlosomar atum aphan kelang a doctor kave det ajoine inglong pen nangsunsi Hojai, Nagaon lapen kaprek-kaprek angtan a district alongsi seh chelang dam nangkok lo. Ajahak atum Karbi Anglong ahempi along kedo Diphu Civil Hospital along ansi seh nang chelang nang lo. Laso ajoine akhi-adat kijumhek atum penang akisung chetong nang lo.
Lasi West Karbi Anglong district ahempi along kedo Hamren Civil Hospital along prapjin pen osomar aphan kelang lapen oso kachapathe arlosomar aphan kelang a doctor nangtoi nangji pusi Hamren rongsopi arat atum kachoningri.
West Karbi Anglong a district inglong havar malom lapuson keme muchot seh kachelang adim do pu kipu longle det ajoine rongsopi pen kechenglok rongso-rongbot arat atumta Hamren Civil Hospital alongsi seh kachelangji aphan keso chevan seta ladak doctor kave det ajoine katora doko titi lo. 
Keso pen keme detji aphan akhi-adat chelong chainong longle, phelang, bari bithung chinghon thekthesi jor pen akahelo seh kachelang damta Hamren Civil Hospital bi tekangkok pen kahelo Hojai, Nowgaon, Guwahati lapen Diphu an km 200 abat dam nang koklo.
Pinpurme, atumi There 12 arni KAAC EM barim George Millik asopi Rimrin Millikpi keso ajok Hamren Civil Hospital along kachevan pen doctor nurse kave ajok ningduk chepaklang lo.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives