ADVERTISEMENT

This area is available for advertisement. Please contact for details.

Arnivang
Get Adobe Flash player

MoU, 1995 along “alienation of land” pu ketokdet ke kaheno lo

J.I Kathar, IAS (Rtd.): Alienation of Land, jasemet ke Tribe atum alongle keche atum arideng pedam et, pu akatora aphuthak ACS, IAS, APS, IPS atum a seke ahut chethan pik. Assam Tribal Research Institute ta bangso aphuthak a lamchap ketok do-o. Karlitang Dr. B.N.Bordoloi ta epak alamchap laso aphuthak tok lo. Majok amonit ta amethang alongle kaprek akhei amonit arideng pedamjui lote, alienation of land pusi pudet. North-East India alongri ke tribe atum alongle, jat akaheno atovar penle pedam tame, Keche atum arideng pedamjui lote, lake “alienation of land” pusi pudet. Laso alam ke majok a ACS, IAS, APS, IPS a officer lapen Assam Tribal Research Institute along keklem abang aphant le arju seta nangthan thek po.
Non ilitum inglong arat aphant akaheno nangkedokok alam ke lapuson. Inut Mr. Dey, alangli ahut isi Assam a Inspector General of Police. Halabangso ahut Assam State angbong, police officer kethenei ke IGP helo. Alangli piso ke Sitimon Sawian, Khasipi. Alangli apiso amen pen longle namji pulo, Khasi Hills Autonomous Council permission pipedet, atheke, Khasi Hills ke Sixth Schedule alongri. Lake Paragraph 1 lapen 20 pen Tribal Area pu kapachethang do. Paragraph 3 ateng penke jat atovar pen seta tribe atum alongle ke Keche atum arideng pele longle. English penke, (Land of the Tribes People in Areas governed by the Sixth Scheduled cannot be transferred or alienated to Non-Tribe people in any manner. The word “transfer” is not written in Paragraph 3).
Apenan abang, Sitimon Sawian amen pen Man kedo Gauhati High Court along United Khasi-Jaintia  Hills Autonomous District Council aphuthak case pidamdet lo. Case No.1971 SSC(3) 708 lapen 1972  AIR 787. Gauhati High Court pulo, Paragraph 3 alongke, longle ka “transfer” pu alam tokte. La apotsi, Sixth Schedule a angkangk arlo ke, Keche atum, jat atovar penta, longle kacheraiji aron ave lapen cherai longle.  Mr. Dey atum pulo, United Khasi-Jaintia Hills District (Transfer of Land) Act, 1953, Section 3 along kipu do, “previous sanction of the District Council” jongsi do lote, atheke, District Council jongsi chekroi dun lote, Sixth Schedule angkang arlo alongle Keche atum  aphant jor long mate “alienate” mate “transfer” long. Gauhati High Court ingsai si judgment pidet lo, Sixth Schedule Paragraph 3 kipu ke, Autonomous Council atum longle ka alienate ji mate ka transfer ji ajakong ave. La-an chot kali, Sixth Schedule a kitap arlo nohok ta longle ka transfer mate ka alienate alam amatsi ave. La apot si la United Khasi-Jaintia Hills District (Transfer of Land) Act, 1953 ke kechokcheh aront, lake “void” pusi Gauhati High Court pudet lo.
Non alam ke lapulo. The Mikir Hills District (Transfer of Land) Act, 1959 lapen hala United Khasi-Jaintia Hills District (Transfer of Land) Act, 1953 ke esonpet lo. Aningkan si keprek chot lo. La hini aron alongta “Transfer of Land” lapen “Alienation of Land” pu alamthe ave pu, Bangasena  atum chini, lapen labangso alamthe kavedet apotsi Mr. Dey lapen kaprek Bangasena atump inglong arat alongle chithi dun longle det lo puta latum chini peme lo. Lasi Karbi Anglong Bangabhumi kapinchong ji te, Sixth Schedule aron arlo konatne “ransfer of land” kalite “alienation of land” pu alamthe pangkep dunchok nangji puke Bangasena atum kachini lapen kabor-i 1971 aningkan pen lo. Lasi ASDC atum kachesong ahut alangli tum lutdun chok – infiltrate – dun detsi, MoU kachetok ahut “alienation of land” pu alamthe pangkep dunchok lo. La kapangkep dunchok pen ajok, 1971 aningkan Sitimon Sawian a case along Mr. Dey kerem-ih athe, mate a ‘point’ – “transfer of land” pu alamthe Paragraph 3 along  avedet apot, ke “invalid” mate akejoinak pacheplangdet lo. Atheke, nonke “alienation of land” pu Sixth Schedule Paragraph 3A (1) (0) along pangkep dunchok lo. La kapangkep dunchok pen ajok Sitimon Sawian a case along Mr. Dey keremp-idet athe mate a ‘ground’ ke varphit lo. Laso pen ajok, “The Mikir Hills District (Transfer of Land) Act, 1959, – Gauhati High Court lapen Supreme Court ta kiputang, kechokche aron, – “void” pu aron ta kechok aron puthukok lo.
Sixth Schedule aron ke Bangasena atum aphan asap ta jakong pipedet apot,  alangli tum aron ajakong kelongji aphan bidikanglim pen loksi keklem. Sixth Schedule alongle, aron ajakong alangli tum aphan do asonte, alangli tum arlo pen klemjoijedet ji. Bangasena, Bengali Hindu lapen Bangladeshi ke akheivet lo. Sixth Schedule kaphangno ji aphan latum Karbi lapen inglong arat atum nongnong aphan ensi, kapeklemtoi. MoU, 1995 along ASDC atum kachekroi dun ke, (feasibility of inclusion of “alienation of land” will be examined) pu anat. Seta Bangasena atum aphan ke la jerso kekroi dun naknak anta chok lo. Bisar alam, jerso ingphun piki anta chok lo. Lasi, The Sixth Schedule to the Constitution (Amendment), Act, 1995 along ke “alienation of land” pu thap dunjoi si, Karbi Anglong lapen Dima Hasao alongri arlo alongle an, Keche atum aphan ninghang aling pi tame pu Sixth Schedule aron pinchongdet lo. Karbi lapen inglong arat alongle le kerai kangtung varet asonte, Bangasena atum hala “alienation of land” pu along “against alienation of land” pusi tokdetji apot lo. Seta “against” pu alamthe ke toktedet lo.
Article 246 ateng pen Seventh Schedule bi lo. List I, lake Union List along kedo a subject an aphuthak Union Government aron kaselamji ajakong do. List II, lake State List along kedo a subject an aphuthak State Government atum amethang methang aning kehang ateng aron selam un. List III lake Concurrent List, ladak kedo a subject aputhak ke Union Government ta State Government ta kachekroi ateng pen aron selam un. Seta Sixth Schedule alongri aphant ke, son thom pli a subject aparke, Union Government ta State Government ta aron selam un-eh. Atheke, Sixth Schedule ke akaprek bihek a Constitution, Mini Constitution. Sixth Schedule pen kikim a Autonomous Council atum Union Government kaselam aron deng nangji, seta Autonomous Council arlo kedo inglong arat atum aphan kemesenji aphan Union Government kalite State Government atum kaselam aron kenangji an lardet aphi si, Autonomous Council atum deng unji. Kelarta Autonomous Council amethang si larji. Union Government mate State government ke Sixth Schedule alongri aphan ke aron  larpi un-eh.
Akehai Jotson Bey, ajahak birta aloh along There 5, 2019 arni kapachetak, (‘Alienation Of Land’ ke India constitution pen state ratpangri atum aphan longle ajakong kipi avarsai chot) pu alam ahok.  Seventh Schedule List II ke State government alongri ajakong. Lake Sixth Schedule alongri ajakong kali. Sixth Schedule arlo ninghok ta Seventh Schedule List II alam tokte. List I pen List III alam anat ketok. Seventh Schedule List II, No. 18 pen 45 along kipu alongle ke, Sixth Schedule angtan kedo alongle aphan alam. Lake inglong arat atum Sixth Schedue arlo kedo alongle alam le kipu kali. Sixth Schedule arlo alam ke, longle alam tame, jat alam tame Sixth Schedule arlo a inglong arat atumsi jakong dochot. Seventh Schedule ajakong ke Sixth Schedule arlo thang ajakong ta ave lo. Lasi “Mini Constitution” mate “Constitution within Constitution” pu kipudet lo. Chethan aling seta, MoU, 1995 along “alienation of land” pu ketokdet ke kaheno lo pusi J. I. Kathar, IAS (Rtd.) kejong.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives