ADVERTISEMENT

This area is available for advertisement. Please contact for details.

Arnivang
Get Adobe Flash player

Klengdun Teron arong kachevoi

Our Correspondent,
Kheroni, Thekar, There 12:
No.7 Kopili constituency angkang kedo Chengbong arong amekar Thong Teron pen Julie Rongpharpi atum asopo adakvam Klengdun Teron don-rap lapen jirpo-jirpi atum aphan che-oh tekangsi sangtet cho-en damjui lo. There 11 Urmi aningve porphai 8.45 apor malom kado kave aphan che-oh tekangsi arong chevoi jui lo. Arong kachevoi jui Klengdun Teron ke KAAC CEM Tuliram Ronghang a ongsar lo. Pinpurme, atumi There 11 arni Dongkamukam along BJP kilik kapachethang amai along chetong dun det pen arnikangsam amethang ahem along kachesang ahutsi alangli men-men keso tangret lo. Laso aphi alangliphan seh kelang ahem keponji aphan bor-i lo, seta tovar ebengsi kado kave aphan che-oh tekangsi arong chevoijui lo. Arnikangsam apor Dongkamukam along mai dundet aphi penanso Langmepi along adam asar alongta chetong dun puta ahem asor atum than. Pinpurthume alangli ajo an ta cho dundesi lang jun lo. Laso alang kijun kapachethuk amat alangli chethe che-en un-eh det lo. Laso ajoine seh kelang damji aphan Kheroni Model Hospital along ponlo seta haladak kele anke chethe ave det lo puta than. Kt. Klengdun Teron kerengtik ahut rat aphan kangthurji aning kehangpik abang. Lasi rat asai keklem bom lo. KCS Jengkha Zonal Committee along ta bidisar arpu do lapen KASA along ta chunbang arpu dodong lang. Anparta Kopili VDC a chairman anghoita alangli kangni tang abang lo, laso ahut alangli rat pen kachingki chethan mesen ajoine rat atumta alangli ning ingsam lo. Kithi ahut arta 49 bak dopo pusi apo Thong Teron than. Alangli bangso apirthe along apai-apo, a ik, abong bang 10, apiso lapen aso bang hini aphan chepamo tekang lo.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives